پاکستان نے روسی خام تیل کا پہلا آرڈر دے دیا

پاکستان میں وزارت پیٹرولیم نے تصدیق کی ہے کہ روسی خام تیل سستے داموں خریدا جا رہا ہے۔ بتایا گیا ہے کہ اسلام آباد اور ماسکو کے مابین حال ہی میں ایک ڈیل کو حتمی شکل دی گئی تھی، جس کے تحت روسی تیل کی پاکستان درآمد ممکن ہو رہی ہے۔

منصوبوں کے مطابق روسی خام تیل کی پہلی کھیپ مئی کے مہینے میں ہی کراچی کی بندرگاہ تک پہنچ جائے گی۔ ماہرین کے مطابق پاکستان اور روس کے مابین اس تعاون سے ملکی توانائی کی ضروریات کو پورا کرنے میں کافی حد تک مدد مل سکے گی۔

پاکستان جلد ہی روسی تیل درآمد کرنا شروع کر سکتا ہے

ایل این جی یورپ خرید لے گا تو پاکستان اور بنگلہ دیش کا کیا ہو گا؟

پیٹرولیم کے وزیر مصدق ملک نے میڈیا کو بتایا ہے کہ اس ڈیل کے تحت اگر پہلی کھیپ بغیر کسی مسئلے کے پاکستان پہنچ جاتی ہے تو بعد ازاں یومیہ ایک لاکھ بیرل خام تیل پاکستان درآمد کیے جانے کی امید پیدا ہو سکتی ہے۔ انہوں نے کہا کہ اس تناظر میں روسی حکومت اور کمپنیوں سے اچھی رابطہ کاری جاری ہے۔

مصدق ملک نے مزید کہا، ''جی ، بالکل یہ سچ ہے کہ ہم خام تیل منگوا رہے ہیں، ریفائنڈ نہیں۔‘‘ تاہم انہوں نے واضح کیا کہ یہ پہلا قدم ہے۔ وزیر کے مطابق پاکستانی آئل ریفائنریز اس خام تیل کو پروسیس کریں گی۔

روسی وزیر برائے توانائی نکولائی شولگینوف نے ایک وفد کے ہمراہ جنوری میں ہی اسلام آباد کا دورہ کیا تھا۔ اس دوران انہوں نے کہا تھا کہ پاکستان کو تیل کی فراہمی مارچ سے شروع ہو سکتی ہے۔

ع ب/ ا ا (خبر رساں ادارے)