’پاکستان نے سی پیک کے تحت 25 بلین ڈالر کے منصوبے مکمل کیے‘

نگران وزیر اعظم انوار الحق کاکڑ نے یہ بیان بیجنگ میں بیلٹ اینڈ روڈ فورم سے خطاب کرتے ہوئے دیا ہے۔ سی پیک چین کے 'بیلٹ اینڈ روڈ انیشیٹو‘ کے تحت ایک اہم منصوبہ ہے، جس میں 241 ملین آبادی والے جنوبی ایشیائی ملک پاکستان میں سڑکوں، ریل کی پٹریوں اور دیگر بنیادی ڈھانچے کی ترقی کے لیے 65 بلین ڈالر سے زیادہ کی سرمایہ کاری کا وعدہ کیا گیا تھا۔

انوار الحق کاکڑ کا کہنا تھا، ''ہم نے سی پیک کے تحت 25 بلین ڈالر کے 50 سے زائد منصوبے مکمل کیے ہیں۔‘‘ انہوں نے مزید بتایا کہ جنوب مغربی گوادر بندرگاہ پر چینی سرمایہ کاری سے ایک بہت ہی اہم ہوائی اڈہ بھی تعمیر کیا جا رہا ہے، جس کا جلد ہی افتتاح کر دیا جائے گا۔

گوادر بندرگاہ آبنائے ہرمز کے قریب واقع ہے اور یہ بحیرہ عرب میں تیل کی ترسیل کا ایک اہم راستہ ہے۔ بیجنگ حکومت نے معدنیات سے مالا مال صوبہ بلوچستان میں بہت زیادہ سرمایہ کاری کر رکھی ہے اور اسی سرمایہ کاری کے تحت گہرے پانیوں والی گوادر بندرگاہ کی ترقی جاری ہے۔

چینی صدر شی جن پنگ نے تقریباً ایک دہائی قبل 'بیلٹ اینڈ روڈ انیشیٹو‘ کا آغاز کیا تھا، جس کا مقصد یورپ کے ساتھ ساتھ ایشیا سے لے کر افریقہ تک بنیادی ڈھانچے اور توانائی کے نیٹ ورکس تعمیر کرنا ہے۔

چین میں ان دنوں 'روڈ اینڈ بیلٹ منصوبے‘ کی دسویں سالگرہ کے موقع پر سربراہی اجلاس جاری ہے، جس میں 130 ممالک کے نمائندے اور وفود شرکت کر رہے ہیں۔ پاکستان کے نگران وزیر اعظم بھی اسی تناظر میں چین کے دورے پر ہیں۔

اس سربراہی اجلاس میں روسی صدر ولادیمیر پوٹن بھی شریک ہیں۔ چین کے سربراہ مملکت شی جن پنگ اور روس کے صدر ولادیمیر پوٹن نے بھی شاہراہ ریشم کے سربراہی اجلاس کے موقع پر دونوں ممالک کے درمیان قریبی تعاون کا اعادہ کیا ہے۔

چینی صدر نے اپنے روسی ہم منصب کے ساتھ ملاقات میں کہا کہ دونوں ملکوں کے مابین اسٹریٹیجک ہم آہنگی قریبی اور موثر ہے جبکہ دو طرفہ تجارتی حجم بھی اب تک کی بلند ترین سطح پر پہنچ گیا ہے۔ روسی صدر نے کہا کہ 'آج کی مشکل دنیا میں‘ چین کے ساتھ قریبی خارجہ پالیسی بہت ضروری ہے۔

ا ا / ک م (ڈی پی اے، اے ایف پی)