پاکستان پر دباؤ جاری رہے گا، امریکی جنرل ڈیمپسی

واشنگٹن سے موصولہ رپورٹوں کے مطابق امریکی فوج کے نئے اعلیٰ ترین فوجی عہدیدار کے طور پر نامزد کیے جانے والے جنرل ڈیمپسی نے منگل کے روز اپنے اس عزم کا اظہار کیا کہ جوائنٹ چیفس آف سٹاف کا چیئر مین بننے کے بعد ان کی ترجیح ہو گی کہ پاکستان پر عسکریت پسندوں کے خلاف زیادہ سے زیادہ مؤثر کارروائیوں کے لیے دباؤ جاری رکھا جائے۔

جنرل مارٹن ڈیمپسی نے ایڈمرل مائیک مولن کے جانشین کے طور پر اپنی تقرری کی پارلیمانی تصدیق سے پہلے امریکی سینیٹ کی ارکان کی طرف سے سوالات کے جواب دیتے ہوئے کہا کہ پاکستان امریکہ کا ایک اہم پارٹنر ملک ہے تاہم یہ اس کی غلطی ہے کہ وہ بھارت کو اپنا سب سے بڑا دشمن سمجھتا ہے۔

امریکی سینیٹ کی آرمڈ فورسز کمیٹی کے سامنے پیشی کے دوران جنرل ڈیمپسی نے منگل کے روز کہا کہ امریکی مسلح افواج کے چیئر مین جوائنٹ چیفس آف سٹاف کے طور پر ان کی کاوش ہو گی کہ پاکستان کے ساتھ مل کر اس طرح کام کیا جائے کہ افغانستان کے ساتھ سرحدی قبائلی علاقوں میں دہشت گردوں اور عسکریت پسندوں کے وہ محفوظ ٹھکانے ختم ہو جائیں، جہاں سے شدت پسند اپنی کارروائیاں جاری رکھے ہوئے ہیں۔

جنرل ڈیمپسی کے بقول پاکستان میں یہ خیال عام ہے کہ اس کے ریاستی وجود کو بھارت سے خطرہ ہے۔ اس کے برعکس صوبے خیبر پختونخوا اور قبائلی علاقوں میں فعال دہشت گردوں کو اتنا بڑا خطرہ تصور نہیں کیا جاتا۔ انہوں نے کہا کہ یہی وجہ ہے کہ پاکستان اپنے عسکری اور مالی وسائل کو بھی دہشت گردوں کے خلاف جنگ کے بجائے بھارت کے حوالے سے اپنی فوجی صلاحیتوں کو بہتر بنانے پر زیادہ استعمال کرتا ہے۔

ماضی میں عراق میں امریکی فوجوں کے کمانڈر رہ چکنے والے جنرل ڈیمپسی نے امریکی سینیٹ کے ارکان کو بتایا کہ واشنگٹن اسلام آباد کو اس امر کا قائل کرنے کی کوشش میں ہے کہ پاکستان کو اس کے مغرب میں انتہا پسندوں سے بھی اتنا ہی یا اس سے بھی زیادہ خطرہ لاحق ہے، جتنا کہ اسے مبینہ طور پر بھارت سے ہے۔

رپورٹ: مقبول ملک

ادارت: عاطف بلوچ