پاکستان: پولنگ جاری، موبائل سروس عارضی طور پر معطل

 

پاکستان کی تاریخ کے بارہویں عام انتخابات کے لیے پولنگ کا آغاز آج صبح آٹھ بجے ہوا، جو شام پانچ بجے تک جاری رہے گی۔ وزارت داخلہ نے سکیورٹی کے خدشات نیز ملک بھر میں امن و امان کی صورت حال قائم رکھنے کے لیے موبائل فون سروسز کوعارضی طورپر معطل کر دیا ہے۔

وزارت داخلہ کی طرف سے جاری بیان میں کہا گیا ہے کہ ملک میں دہشت گردی کے حالیہ واقعات کے نتیجے میں قیمتی جانوں کا ضیاع ہوا ہے اور امن و امان کی صورت حال کو قائم رکھنے اور ممکنہ خطرات سے نمٹنے کے لیے حفاظتی اقدامات ناگزیر ہیں۔ "اس لیے ملک بھر میں موبائل سروس کو عارضی طورپر معطل کرنے کا فیصلہ کیا گیا ہے۔"

پاکستان کے انتخابی عمل میں آزادی اور شفافیت کی کمی پر امریکہ کو تشویش

 عام انتخابات کے لیے دو لاکھ 77 ہزار فوجی افسران و اہلکار تعینات کیے گئے جبکہ ان کے ساتھ رینجرز اور ایف سی اہلکار بھی سکیورٹی پر مامور ہیں۔

پاکستان کے بارہویں عام انتخابات میں پچیس کروڑ آبادی کا نصف یعنی  12 کروڑ 79 لاکھ سے زیادہ رجسٹرڈ ووٹرز اپنے حق رائے دہی کا استعمال کریں گے۔ انتخابات میں قومی اسمبلی کی 266 اور چار صوبائی اسمبلیوں کی مجموعی طور پر 571 نشستوں پر مقابلہ ہو رہا ہے۔

آج ہی نتائج آجانے کی امید

یہ پولنگ ایسے وقت ہورہی ہے جب ایک روز قبل ہی بلوچستان کے ضلع پشین اور قلعہ سیف اللہ میں انتخابی امیداروں کے دفاتر کے باہر بم دھماکے کیے گئے، جن کی ذمہ داری داعش نے قبول کرنے کا دعویٰ کیا۔

اس سے قبل بھی حالیہ دنوں میں ملک کے بیشتر علاقوں خصوصاً بلوچستان اور خیبرپختونخوا میں شدت پسندی کے واقعات ہوئے ہیں، جن میں عام شہریوں سمیت متعدد سکیورٹی اہلکاروں کی بھی جانیں گئیں جبکہ سکیورٹی فورسز کی کاررائیوں میں کئی عسکریت پسندوں بھی مارے گئے۔

اب تک قومی اسمبلی کے ایک اور صوبائی اسمبلیوں کے تین حلقوں سمیت چار انتخابی حلقوں میں امیدواروں کی اموات کی وجہ سے الیکشن ملتوی کیے جا چکے ہیں۔

چیف الیکشن کمشنر سکندر سلطان راجہ کی جانب سے چاروں صوبوں کے حکام کو سکیورٹی ہائی الرٹ رکھنے کی ہدایت دی گئی ہے۔ ان کے مطابق "سکیورٹی صورت حال کا جائزہ ایجنسیوں اور وزارت داخلہ کا کام ہے۔ ہم وزارت داخلہ کو موبائل سروس کھولنے کا نہیں کہیں گے۔"

پاکستان میں 'الیکشن نہیں اب سلیکشن ہوتا' ہے، بھارتی تجزیہ کار

شام پانچ بجے پولنگ کے اختتام کے بعد ہر پولنگ سٹیشن میں ووٹوں کی گنتی شروع ہو گی اور تقریباًآج رات نو بجے کے بعد غیر حتمی اور غیر سرکاری نتائج آنا شروع ہو جائیں گے۔ تاہم سرکاری اور حتمی نتائج الیکشن کمیشن آف پاکستان ووٹنگ ڈے کے بعد 14 روز میں گزٹ نوٹیفیکیشن کے ذریعے جاری کرنے کا پابند ہے۔

پاکستان کی بڑی سیاسی جماعتوں کے علاوہ کئی دوسری پارٹیوں نے بھی آج کے انتخابات کے لیے امیدواروں کو میدان میں اتارا ہے۔

پاکستان میں نچلی ذات کے ہندو مناسب نمائندگی سے محروم کیوں؟

الیکشن کمیشن نے الیکشن میں حصہ لینے والی تمام جماعتوں کو انتخابی نشانات جاری کیے ہیں۔ تاہم سپریم کورٹ کے ایک فیصلے کے تحت پاکستان تحریک انصاف کو انتخابی نشان الاٹ نہیں کیا گیا جس کے باعث اس کے ہزاروں امیدوار الگ الگ نشانات کے ساتھ آزاد حیثیت میں انتخابات میں حصہ لے رہے ہیں۔

ج ا / ص ز (خبررساں ادارے)