پاکستان کی تاریخی فتح اور مصباح کے لیے تاریخی الوداعی تحفہ

ویسٹ انڈیز کے خلاف یہ ٹیسٹ سیریز جیت کر پاکستان نے ایک مرتبہ تو تاریخ رقم کر دی ہے۔ وسیٹ انڈیز کے خلاف پاکستانی ٹیم تقریباﹰ ساٹھ برس بعد ایسی کامیابی حاصل کر سکی ہے۔ پاکستان کی کرکٹ کی دنیا میں ایک ایسے خواب کو تعبیر ملی ہے، جو نصف صدی سے بھی زائد عرصے سے دیکھا رہا تھا۔

ڈومینیکا کے ونڈسر پارک سٹیڈیم میں کھیلے جانے والے تیسرے اور آخری کرکٹ ٹیسٹ میچ کے آخری دن پاکستان ویسٹ انڈیز کو 101 رنز سے سنسنی خیز شکست دینے میں کامیاب رہا ہے۔ ویسٹ انڈیز کی پوری ٹیم 202 رنز بنا کر آؤٹ ہو گئی جبکہ انہیں جیت کے لیے 304 رنز درکار تھے۔

ویسٹ انڈیز کی ٹیم صرف ایک اوور مزید کھیل لیتی تو اس نے یہ ٹیسٹ میچ ڈرا کرنے میں کامیاب ہو جانا تھا لیکن پاکستانی ٹیم کو سکینڈ لاسٹ اوور میں یہ کامیابی نصیب ہوئی۔ ویسٹ انڈیز کے آخری بلے باز شینن گیبریل یاسر شاہ کے اوور کی آخری گیند پر آوٹ ہوئے، تو اس سیریز اور میچ کی کایا ہی پلٹ گئی۔ پاکستان ویسٹ انڈیز کے خلاف یہ سیریز دو، ایک سے جیتنے میں کامیاب رہا ہے۔

اتوار کے روز ڈومینیکا کے ونڈسر اسٹیڈیم میں ختم ہونے والا سیریز کا تیسرا اور آخری ٹیسٹ پاکستانی ٹیم کے کپتان مصباح الحق اور سٹار بیٹسمین محمد یونس کے کیریئر کا آخری ٹیسٹ بھی تھا، جس میں بہت سنسنی خیز مقابلے میں پاکستان کا یہ سیریز دو ایک سے جیت لینا مصباح اور یونس کے لیے یادگار الوداعی تحفہ ثابت ہوا۔

کیا یونس اور مصباح ساٹھ سالہ تاریخ بدل پائیں گے؟

شینن گیبریل کے آوٹ ہونے کے بعد مصباح الحق کا کہنا تھا، ’’یہ ناقابل یقین ہے۔‘‘ اس تاریخی فتح کے بعد مصباح کا گفتگو کرتے ہوئے مزید کہنا تھا، ’’آخری سیشن میں بہت ساری چیزیں ایک ساتھ ہو رہی تھیں۔ کیچ ڈراپ ہوئے، اپیلیں ہوئیں، نو بالز کے مسائل ہوئے، ایک لمحے کے لیے تو یوں محسوس ہو رہا تھا کہ ہم جیت نہیں سکیں گے۔‘‘

یونس خان کے 10 ہزار رنز، دیر آید درست آید

ان کا مزید کہنا تھا، ’’میں اپنے آپ کے لیے شکر گزار ہوں، ساری ٹیم اور پاکستان کرکٹ کے تمام مداحوں کا بھی کہ ہم اسے جیتنے کے قابل ہوئے۔‘‘

لیگ سپنر یاسر شاہ کو مین آف دی سیریز قرار دیا گیا، انہوں نے تین میچوں پر مشتمل اس سیریز میں پچیس وکٹیں حاصل کیں ہیں۔ دوسری جانب روسٹن چیز نے شاندار بیٹنگ کی لیکن ان کا افسوس کا اظہار کرتے ہوئے کہنا تھا، ’’میں واقعی افسردہ ہوں کہ میں مزید ایک اوور کے لیے زیادہ نہیں ٹھہر سکا۔‘‘