’’پاکستانی اور امریکی خفیہ اداروں میں تناؤ‘‘

برطانوی اخبار دی گارجیئن نے آئی ایس آئی کے ایک عہدیدار کے حوالے سے بتایا کہ پاکستان میں دو یا تین خفیہ امریکی ایجنٹ سرگرم ہیں۔’’اگر سی آئی اے اعتماد کی فضاء بحال کرنا چاہتی ہے تو اسے ثابت کرنا ہوگا کہ ریمنڈ ڈیوس جیسے اور ایجنٹ سرگرم نہیں اور ہماری پیٹ پیچھے کارروائیاں ترک کرنا ہوں گی۔‘‘

آئی ایس آئی کے اس عہدیدار کے مطابق دونوں ایجنسیاں ایک دوسرے پر انحصار کرتی ہیں تاہم مستقبل میں تعاون کا سلسلہ جاری رکھنے کے لیے ’برابری اور احترام‘ کا خیال رکھنا ہوگا۔

فارنرز ایکٹ کی خلاف ورزی کے الزام میں پشاور میں گرفتار امریکی شہری کا نام Aaron DeHaven بتایا جارہا ہے جو اسلام آباد کے امریکی سفارتخانے میں ذمہ داریاں نبھا چکا ہے۔ بتایا جارہا ہے کہ DeHaven جس کمپنی Catalyst Services کے لیے کام کرتے ہیں اس کے دبئی اور افغانستان میں بھی دفاتر قائم ہیں اور اس کمپنی کا عملہ سابق فوجیوں پر مشتمل ہے۔

فی الحال یہ واضح نہیں کہ حالیہ گرفتاری ریمنڈ ڈیوس کے معاملے کے بعد آئی ایس آئی اور سی آئی اے کے درمیان پیدا شدہ تناؤ سے متعلق ہے۔ برطانوی اخبار دی گارجیئن نے ذرائع کے حوالے سے دعویٰ کیا ہے کہ ریمنڈ ڈیوس امریکی جاسوس ہیں۔

36 سالہ سابق فوجی ریمنڈ ڈیوس نے چارج شیٹ پر دستخط سے انکار کر رکھا ہے اور سفارتی استثنیٰ کے مطالبے پر قائم ہے۔

دوسری جانب DeHaven کے متعلق بتایا جارہا ہے کہ اس نے ایک پاکستانی خاتون سے شادی کر رکھی ہے، پاکستانی سیاسی امور سے بخوبی واقف ہے اور روانی سے پشتو بولتا ہے۔ دی گارجیئن کے مطابق یہ امریکی شہری گزشتہ سال پشاور سے اس وقت اسلام آباد منتقل ہوا، جب اس پر بلیک واٹر کے لیے کام کرنے کا شبہ کیا جانے لگا تھا۔

امریکی سفارتخانے کی ترجمان Courtney Beale کا کہنا ہے کہ DeHaven براہ راست طور پر امریکی حکومت کا ملازم نہیں تاہم اس وقت تک تفصیلات کی تصدیق نہیں کی جاسکتی جب تک امریکی عہدیدار ان سے ملاقات نہ کرلیں۔ واشنگٹن میں امریکی عہدیداروں کا البتہ مؤقف ہے کہ DeHaven ایک سفارتکار ہیں اور انہی فی الفور رہا کیا جانا چاہیے۔

سی آئی اے کے ترجمان جورج لٹل کا البتہ کہنا ہے کہ دونوں ایجنسیوں کے درمیان تعلقات معمول کے مطابق ہیں۔ دی گارجیئن کے مطابق پاکستان کی سویلین حکومت بھی ریمنڈ ڈیوس کے معاملے پر آئی ایس آئی سے ناخوش ہے کہ وہ میڈیا میں بعض چیزیں عام کرکے امریکہ سے رعایت حاصل کرنا چاہتی ہے۔

منگل کو پاکستانی فوجی سربراہ جنرل اشفاق پرویز کیانی اور امریکی فوجی سربراہ ایڈمرل مائیک مولن کی ملاقات کو بھی اسی معاملے سے متعلق قرار دیا جارہا ہے۔

رپورٹ : شادی خان سیف

ادارت : امتیاز احمد