پونے دو لاکھ انسانوں کا معاون قاتل: عمر 94 برس، سزا پانچ سال
17 جون 2016
جرمن شہر ڈَیٹمولڈ سے جمعہ سترہ جون کو ملنے والی نیوز ایجنسی اے ایف پی کی رپورٹوں کے مطابق یہ سابق نازی فوجی ہٹلر دور کے ایس ایس دستوں کا ایک گارڈ تھا۔ آج جمعے کے روز ایک عدالت نے اسے آؤشوِٹس کے اذیتی کیمپ میں قتل عام کے طویل عرصے تک رونما ہونے والے بہت سے واقعات کا معاون مجرم قرار دیتے ہوئے یہ سزائے قید سنائی۔
آؤشوِٹس (Auschwitz) کا اذیتی کیمپ نازیوں نے مقبوضہ پولینڈ میں قائم کر رکھا تھا جہاں مجموعی طور پر لاکھوں انسانوں کو موت کے گھاٹ اتارا گیا تھا۔ اِس وقت 94 سالہ رائن ہولڈ ہیننِگ کو یہ سزا اسی کیمپ میں ایک لاکھ ستر ہزار انسانوں کا معاون قاتل ثابت ہو جانے پر سنائی گئی ہے۔
اے ایف پی کے مطابق آج جب کہ دوسری عالمی جنگ کو ختم ہوئے سات عشروں سے بھی زائد کا وقت گزر چکا ہے، مجرم ہیننِگ کے خلاف اپنے اختتام کو پہنچ جانے والا یہ مقدمہ شاید دنیا میں اپنی نوعیت کی وہ آخری عدالتی کارروائی ثابت ہو جس کا مقصد ہولوکاسٹ کے مرتکب کسی مجرم کو سزا دلوانا ہو۔
ڈَیٹمولڈ کی عدالت نے اپنے فیصلے میں کہا، ’’170000 واقعات میں قتل کے عمل میں معاون ثابت ہونے پر ملزم کو پانچ سال قید کی سزا سنائی جاتی ہے۔ ملزم اس امر سے باخبر تھا کہ آؤشوِٹس کے کیمپ میں ہر روز معصوم انسانوں کو گیس چیمبروں میں قتل کیا جاتا تھا۔‘‘
اس مقدمے کی چار ماہ تک جاری رہنے والی سماعت کے دوران متعدد گواہوں کی طرف سے کئی ایسے ہولناک واقعات کی تفصیلات بیان کی گئی تھیں، جو عشروں پہلے اسی نازی اذیتی کیمپ میں قید رہ چکے تھے۔ اب تک زندہ ان سابقہ قیدیوں نے گواہوں کے طور پر اپنے بیانات میں رقت طاری کر دینے والی جزئیات کے ساتھ عدالت کو بتایا تھا کہ کس طرح دوسری عالمی جنگ کے دور میں اسی کیمپ میں قیدیوں کے طور پر وہ ’جیتے جاگتے ایک جہنم سے گزرے‘ تھے۔
اس مقدمے میں اب مجرم ثابت ہو جانے والے ملزم ہیننِگ کے خلاف اپنے دستاویزی شواہد میں استغاثہ نے عدالت کو بتایا تھا کہ کس طرح ایس ایس کے ایک نوجوان گارڈ کے طور پر یہ محافظ آؤشوِٹس کیمپ میں اس عمل کی نگرانی کرتا تھا کہ وہاں قیدیوں میں سے کون کون اتنا صحت مند تھا کہ اس سے جبری مشقت لی جاتی اور کس کس کو گیس چیمبرز میں بھیجا جانا ہوتا تھا۔
استغاثہ نے ہیننِگ کے لیے اس کی ضعیف العمری کی وجہ سے چھ سال کی سزائے قید کا مطالبہ کیا تھا جبکہ وکیل صفائی کا موقف تھا کہ ہیننِگ کو بری کیا جانا چاہیے کیونکہ اس نے خود کسی کو کبھی ’نہ قتل کیا تھا، نہ پیٹا تھا اور نہ ہی کسی کا استحصال کیا تھا‘۔
عدالت نے ہیننِگ کو اس کی بزرگی کی وجہ سے پانچ سال کی قید سنائی جبکہ کئی ماہرین کا کہنا ہے کہ سزائے قید کی مدت سے زیادہ اہم بات یہ ہے کہ ہولوکاسٹ کے ایک اور شریک مجرم کو سزا سنا دی گئی ہے اور لاکھوں مقتولین کو پس مرگ اور علامتی طور پر ہی سہی لیکن انصاف مل گیا ہے۔