کریمیا کے روس کے ساتھ الحاق کے بعد نیٹو کا پہلا اجلاس

اس اجلاس میں نیٹو کے رہنما اُن مشرقی یورپی ملکوں کو دفاعی معاونت فراہم کرنے کے لیے نئے اقدامات پر غور کریں گے جو کریمیا کے روس کے ساتھ الحاق پر پریشان ہیں۔ یہ بات بھی زیر غور رہے گی کہ یوکرائن کی مسلح افواج کو کس طرح مضبوط کیا جائے۔

اگرچہ امریکا اور اس کے اتحادی یہ بات واضح کر چکے ہیں کہ وہ غیر رکن یوکرائن میں عسکری مداخلت نہیں کریں گے تاہم انہوں نے مشرقی یورپ میں نیٹو کے رکن ملکوں کو یقین دلایا ہے کہ ضرورت پڑنے پر انہیں تحفظ فراہم کیا جائے گا۔

اس حوالے سے خبر رساں ادارے روئٹرز کے مطابق سفارت کاروں کا کہنا ہے کہ نیٹو کے وزرائے خارجہ عسکری مشقوں میں اضافے اور مشرقی رکن ریاستوں میں تازہ دستے بھیجنے پر غور کریں گے۔ یہ فوجی ان ملکوں میں موجود نیٹو کے فوجی اڈوں پر بھیجے جا سکتے ہیں۔ ماسکو حکومت اس اقدام کو اشتعال انگیز قرار دے سکتی ہے۔

اس کے برعکس خبر رساں ادارے اے ایف پی کے مطابق نیٹو کے وزرائے خارجہ فی الحال روس کے ہمسایہ ملکوں کو فوجی مدد فراہم کرنے کے منصوبے سے پیچھے ہٹ رہے ہیں۔ ایسا ظاہر ہوتا ہے کہ وہ سفارت کاری کی کوششوں کو مزید وقت دینا چاہتے ہیں۔

برسلز میں اجلاس کے آغاز سے قبل نیٹو کے سیکرٹری جنرل آندرس فوگ راسموسن کا کہنا تھا: ’’میرے خیال میں ہر کسی کو اس بات کا احساس ہے کہ سیاسی اور سفارتی بات چیت ہی آگے بڑھنے کا بہترین حل ہے۔‘‘

انہوں نے یہ بھی کہا کہ نیٹو اپنے اتحادیوں کے دفاع کے لیے تیار ہے۔ واضح رہے کہ روس نے قبل ازیں یوکرائن کی سرحدوں سے اپنے فوجی ہٹانے کا اعلان کیا تھا۔ تاہم راسموسن نے منگل کو صحافیوں سے گفتگو میں کہا کہ وہ روس کی جانب سے فوجی ہٹائے جانے کی تصدیق نہیں کر سکتے۔

ان کا کہنا تھا: ’’بدقسمتی سے میں اس بات کی تصدیق نہیں کر سکتا کہ روس اپنے فوج پیچھے ہٹا رہا ہے، ہم نے ایسا ہوتے ہوئے نہیں دیکھا۔‘‘

اس کے برعکس جرمن چانسلر انگیلا میرکل کے دفتر سے ایک بیان جاری کیا گیا تھا جس کے مطابق روسی صدر ولادیمیر پوٹن نے پیر کو ٹیلی فون پر بات چیت میں ذاتی طور پر میرکل کو فوجی پیچھے ہٹانے کے بارے میں مطلع کیا تھا۔

جرمن وزیر خارجہ فرانک والٹر اشٹائن مائر نے کہا کہ تھا کہ یہ پیش رفت کشیدگی کم ہونے کی چھوٹی سی علامت ہے۔ یوکرائن نے بھی پیر کو کہا تھا کہ روسی فوجی اہم علاقوں سے نکل رہے ہیں۔