کیا امداد پاکستانی سیلاب متاثرین تک پہنچ رہی ہے؟

پاکستان میں حالیہ تباہ کن سیلابوں سے بڑے پیمانے پر رونما ہونے والے  انسانی المیے کے ساتھ ساتھ پہلے ہی اقتصادی مشکلات کے شکار ملک کو  تقریباﹰ 10 ارب ڈالر سے زائد مالی نقصان ہوا ہے۔ انسانی ہمدردی کی بنیادوں پر امداد اور بحالی کے کاموں کے لیے اقوام متحدہ سمیت مختلف بین الاقوامی تنظیموں، مالیاتی اداروں اور ممالک نے امداد مہیا کرنے کے وعدے کیے ہیں۔

 پاکستانی وزارت خارجہ کے ایک ذریعے نے نام ظاہر نہ کرنے کی شرط پر ڈی ڈبلیو کو بتایا  کہ اقوام متحدہ کے سیکرٹری جنرل انٹونیو گوٹیرش کی طرف سے اعلان کردہ160 ملین ڈالر کی امداد کا 40 فیصد حصہ مختلف ممالک کی طرف سے امدادی اشیاء کی صورت میں موصول ہو چکا ہے۔ اس کے علاوہ عالمی بینک کی طرف سے 350 ملین ڈالر کی امداد بھی مل چکی ہے۔

غیر ملکی امداد کس طرح تقسیم کی جا رہی ہے؟

حکومت نے سیلاب متاثرین کے لیے 80 ارب روپے کی رقم مختص کی ہے۔ اس رقم میں سے ہر خاندان کو غربت کے خاتمے کی اسکیم بے نظیر انکم سپورٹ پروگرام کے ذریعے 25 ہزار روپے ادا کیے جائیں گے۔ یہ نقد امداد سرکاری اداروں میں پہلے سے رجسٹرڈ مستحقین کے بینک کھاتوں میں براہ راست منتقل کی جا رہی ہے۔

بلوچستان کی صوبائی ڈیزاسٹر مینجمنٹ اتھارٹی سے تعلق رکھنے والے محمد یونس کا دعویٰ ہے کہ غیر ملکی امداد سیلاب متاثرین میں تقسیم کی جا رہی ہے۔ اس بارے میں وضاحت کرتے ہوئے اس سرکاری اہلکار نے کہا، ''غیر ملکی حکومتوں کی امداد نیشنل ڈیزاسٹر مینجمنٹ اتھارٹی کے ذریعے تقسیم کی جاتی ہے۔ این ڈی ایم اے اسے صوبائی ڈیزاسٹر مینجمنٹ حکام کو پہنچاتا ہے، جو اسے ضلعی انتظامیہ کو بھیجتے ہیں، جہاں سے اس امداد کو  آگے مزید قصبوں اور دیگر انتظامی اکائیوں کو بھجوایا جاتا ہے۔ ‘‘

محد یونس کا یہ دعویٰ بھی  ہے کہ مقامی انتظامیہ کے پاس متاثرہ افرادکا ریکارڈ ہے اور امداد دینے سے پہلے متاثرہ شخص کی دستاویزات کی جانچ پڑتال کر کے اس کی تصدیق کی جاتی ہے۔ 

 آئی این جی اوز کی معاونت

 محمد یونس اور ماضی میں آفات سے نمٹنے والے اداروں کے لیے کام کرنے والے متعدد دیگر افراد نے ڈی ڈبلیو کو بتایا کہ بین الاقوامی آئی این جی اوز امداد براہ راست حکومت کے حوالے نہیں کرتی ہیں۔ محمد  یونس کے مطابق ، '' آئی این جی اوز کے اپنے مقامی شراکت دار ہیں یا وہ اشتہارات کے ذریعے ان کی تلاش کرتے ہیں،  ایک نمائندہ اپنے مقامی پارٹنرز کے ساتھ امداد کی تقسیم کے عمل میں شامل ہوتا ہے۔ غیرملکی این جی اوز کا اپنا بجٹ ہوتا ہے، وہ نقصانات اور ان کو پورا کرنے کے لیے ضروریات کے بارے میں اپنے جائزے لیتے ہیں۔ وہ اپنے امدادی علاقوں کا انتخاب بھی خود کرتے ہیں اور پھر حکومت کی اجازت کے بعد وہاں کام کرتے ہیں۔‘‘

مقامی امداد

مقامی این جی اوز لوگوں سے عطیات جمع کرتی ہیں، اپنا بجٹ بناتی ہیں، نقصانات اور ضروریات کا جائزہ لیتی ہیں اور اپنے رضاکاروں کو امدادی سامان کی فراہمی کے لیے استعمال کرتی ہیں۔ ایدھی، الخدمت اور متعدد دیگر مقامی این جی اوز اس وقت متاثرین کی مدد کے لئے میدان میں ہیں۔

آنے والے اداس دن

سیلا ب سے متاثرہ کچھ علاقوں میں اگرچہ پانی کم ہو رہا ہے لیکن وہاں عوام کو درپش مشکلات میں کمی کے کوئی آثار نہیں۔ انہیں وبائی بیماریوں نے پریشان کر رکھا ہے۔ ایک غیر سرکاری امدادی تنظیم الخدمت کا اندازہ ہے کہ کم از کم پچاس لاکھ افراد کو مختلف بیماریوں کا خطرہ لاحق ہے۔

 یونیسیف کو خدشہ ہے کہ 30 لاکھ سے زائد بچوں کو پانی سے پیدا ہونے والی بیماریوں، غذائی قلت اور سیلابی پانی میں ڈوبنےکے خطرات کا سامنا ہے۔ یونیسف نے ان مسائل سے نمٹنے کے لیے 37 ملین ڈالر امداد کی اپیل کر رکھی ہے۔ یونیسیف کے بچوں کو درپیش ماحولیاتی خطرے کے انڈیکس  میں پاکستان کا 163 ممالک میں سے  14واں نمبر ہے۔

 اس عالمی ادارے کا کہنا ہے کہ سیلابوں نے کم از کم 18 ہزار اسکولوں کو نقصان پہنچایا ہے یا انہیں مکمل طور پر تباہ کر دیا ہے۔ یونیسف کے اندازوں کے مطابق اس قدرتی آفت نے16 ملین بچوں پر بھی اثر ڈالا، جن میں سے3.4 ملین کو امداد کی ضرورت ہے۔

ڈبلیو ایچ او کے اندازے کے مطابق صحت کی تقریباﹰ 900 سہولیات کو نقصان پہنچا، جن میں سے 180 مکمل طور پر تباہ ہو گئی ہیں۔ عالمی ادارہ صحت نے انکشاف کیا ہے کہ متاثرہ علاقوں میں پانی کے 30 فیصد نظام کو نقصان پہنچنے کا تخمینہ لگایا گیا ہے، جس سے بیماریوں کے پھیلنے کا خطرہ مزید بڑھ گیا ہے اور لوگ کھلے آسمان تلے رفع حاجت کر رہے ہیں اور غیر محفوظ پانی پی رہے ہیں۔

امداد کہاں سے آئے گی؟

حکومتی اتحاد میں شامل جماعت کے ایک رکن محمد جلال الدین ایڈووکیٹ کا کہنا ہے کہ اسلام آبادحکومت کو بین الاقوامی مالیاتی اداروں، مسلم ممالک، این جی اوز اور پاکستانی عوام سے امداد ملنے کی امید ہے۔  لیکن ماہر معاشیات ڈاکٹر قیصر بنگالی کا خیال ہے کہ اتنی بڑی رقم حاصل کرنا انتہائی مشکل ہے۔

 انہوں نے ڈی ڈبلیو کو بتایا کہ گندم، کپاس، دال، گنے، پیاز اور دیگر فصلیں مکمل طور پر تباہ ہو چکی ہیں۔ انہوں نے کہا،''عطیہ دہندگان کو خود بھی چیلنجز کا سامنا ہے اور پاکستان کو ان سے زیادہ امداد ملنے کا امکان نہیں ہے۔ حکومت کی طرف سے غیر ترقیاتی بجٹ میں کٹوتیوں بشمول غیر جنگی دفاعی اخراجات، پٹرول کی راشننگ اور غیر ضروری درآمدات پر پابندی لگا کر متاثرین کی بحالی کے لیے رقم بچائی جا سکتی ہے‘‘۔

ایس خان (ش ر، ا ا)