کیا اگلی باری شہباز شریف کی ہے؟

پنجاب میں شریف فیملی کے لیے تازہ ترین دھچکا لاہور ڈیویلپمنٹ اتھارٹی کے سابق سربراہ اور پنجاب کے چیف منسٹر میاں شہبار شریف کے دست راست احد چیمہ کی گرفتاری ہے۔ پنجاب حکومت کے ترجمان ملک احمد خان نے اس واقعے کو نامناسب قرار دیا ہے۔ جبکہ ڈی ایم جی افسران کے ایک اعلٰی سطحی وفد نے وزیر اعلٰی پنجاب شہباز شریف سے ملاقات کر کے انہیں اس حوالے سے بیوروکریسی کے تحفظات سے آگاہ کیا۔

بدھ 21 فروری کو قومی احتساب بیورو (نیب) کے اہلکاروں نے آشیانہ اقبال ہاؤسنگ سوسائٹی میں کرپشن کے الزام میں احد چیمہ کو ان کے دفتر سے گرفتار کیا تھا۔ احد چیمہ کو جمعرات کے روز لاہور کی احتساب عدالت میں جج محمد اعظم کے روبرو پیش کیا گیا اور نیب کی جانب سے ان کے جسمانی ریمانڈ کی استدعا کی گئی۔ اس پر احتساب عدالت نے احد چیمہ کو جسمانی ریمانڈ پر نیب کے حوالے کردیا۔

سماعت کے دوران نیب حکام کی طرف سے عدالت کو بتایا گیا کہ احمد چیمہ نے آشیانہ ہاؤسنگ اسکیم میں جعل سازی کی اورسرکاری اختیارات کا ناجائز استعمال کیا جبکہ تفتیش میں بھی تعاون نہیں کیا۔ نیب حکام کے مطابق احد چیمہ نے ایک کمپنی کو فائدہ پہنچانے کے لیے قواعد و ضوابط کو بائی پاس کیا، لہٰذا اس معاملے کی مزید تحقیقات کے لیے ملزم کا ریمانڈ دیا جائے۔ سماعت کے دوران احد خان چیمہ نے عدالت کو بتایا کہ ان پر لگائے گئے الزامات درست نہیں ہیں۔ اس پر نیب کے پراسیکیوٹر کا کہنا تھا کہ یہ وائٹ کالر کرائم ہے جو تہہ در تہہ پردوں میں چھپا ہے اور اس میں کئی اور لوگ بھی ملوث ہیں جو تحقیق کے بعد ظاہر ہوں گے۔ عدالت نے دلائل سننے کے بعد احد خان چیمہ کو پانچ مارچ تک کے لیے جسمانی ریمانڈ پر نیب کے حوالے کردیا۔

ایل ڈی اے کے سابق سربراہ کی گرفتاری پر پنجاب کی صوبائی حکومت کی جانب سے سخت ردعمل سامنے آیا ہے۔ ترجمان پنجاب حکومت ملک محمد احمد کا کہنا تھا کہ نیب نے احد خان چیمہ کو گرفتار کر کے اپنے اختیارات کو پامال کیا ہے اور یہاں ایسی بہت سی مثالیں موجود ہیں، جس میں نیب نے انہیں گرفتار نہیں کیا جو ان کے طلب کرنے پر پیش نہیں ہوئے تھے۔ ان کا کہنا تھا کہ نیب نے سینیئر سرکاری نمائندے کی گرفتاری میں قانونی طریقہ کار پر عمل نہیں کیا اور یہ معاملہ پنجاب حکومت کے لیے تحفظات کا باعث ہے۔

احد چیمہ کی گرفتاری کے بعد صحافیوں سے بات چیت کرتے ہوئے وزیر اعلیٰ پنجاب شہباز شریف کا کہنا تھا کہ نیب کو نیب بن کر کام کرنا چاہیے اور خواہش ہے کہ نیب گزشتہ آٹھ برسوں میں مخلتف منصوبوں میں بچائے گئے اربوں روپے کے بارے میں ہم سے پوچھے۔ ان کا کہنا تھا کہ نیب کو مختلف تحقیقات کے لیے مطلوب تمام ریکارڈ بھیج دیا گیا تھا۔

نیب کے ذرائع کا کہنا ہے کہ اس کے پاس احد چیمہ کے خلاف ٹھوس شواہد موجود ہیں۔ ان کے مطابق احد چیمہ ملک سے باہر جانے والے تھے۔ پنجاب پولیس کے ایک سینیئر افسر نے اپنا نام نہ ظاہر کی درخواست کے ساتھ ڈی ڈبلیو کو بتایا کہ پنجاب حکومت نیب حکام کے خلاف احد چیمہ کے اغوا کا مقدمہ درج کروانے پر غور کر رہی ہے۔

ڈی ڈبلیو سے گفتگو کرتے ہوئے روزنامہ 92 کے گروپ ایڈیٹر ارشاد احمد عارف نے بتایا کہ ابھی صرف احد چیمہ گرفتار ہوئے ہیں۔ ان کی اطلاع کے مطابق آنے والے دنوں میں دو چار ہائی پروفائل گرفتاریاں مزید بھی ہونے جا رہی ہیں: ’’اصل مسئلہ میاں شہباز شریف کی طرز حکمرانی کا ہے، وہ جونیئر افسروں کو نواز کر ان سے اپنے مرضی کے کام کرواتے ہیں۔ اصل میں ہر اہم فیصلہ شہباز شریف خود کرتے ہیں، یوروکریسی صرف استعمال ہوتی ہے۔‘‘

ایک سوال کے جواب میں ان کا کہنا تھا، ’’احد چیمہ کی گرفتاری نے یہ بات واضح کر دی ہے کہ شہباز شریف کو آئندہ وزیر اعظم بنانے کے لیے طاقتور حلقوں کی حمایت حاصل نہیں ہے۔ یا یہ کہ یہ طاقتور حلقے شہباز شریف کے لیے کوئی نرم گوشہ نہیں رکھتے ہیں۔ اگر جاوید اشرف قاضی، اور سعید الظفر جیسے جرنیلوں کے خلاف احتسابی کارروائی ہو سکتی ہے تو پھر شہباز شریف اس عمل سے کیسے مبراء ہو سکتے ہیں۔ بے لاگ اور کڑے احتساب ہی میں ملک کی بہتری ہے اور لگتا ہے کہ ریاست کے اہم اداروں میں اس حوالے سے اتفاق پایا جاتا ہے۔‘‘

اس حوالے سے متوقع رد عمل کے حوالے سے پوچھے جانے والے ایک سوال کے جواب میں  ارشاد احمد عارف کا کہنا تھا کہ نواز شریف کو پارٹی صدارت سے ہٹائے جانے پر ملک میں ایک بھی احتجاجی مظاہرے کا نہ ہونا بہت کچھ واضح کر رہا ہے۔

پاکستان کے ایک ممتاز اور سینیئر صحافی مجیب الرحمن شامی نے ڈی ڈبلیو کو بتایا کہ احد چیمہ کی گرفتاری نے پنجاب حکومت کے لیے مشکل پیدا کر دی ہے اور سرکاری افسران میں اس واقعے کے بعد اضطراب پایا جاتا ہے۔ ان کے بقول احد چیمہ پر لگایا جانے والا الزام بھی دلچسپ ہے کہ اربوں روپے کے منصوبوں کو ڈیل کرنے والے افسر سے تین کروڑ روپے کی زمین کے بارے میں پوچھا جا رہا ہے۔ ان کےخیال میں احتساب کے قانون میں ترمیم کے لیے پیپلز پارٹی نے مسلم لیگ نون کا ساتھ نہیں دیا تھا اس لیے اب احتساب کے موجودہ قانون کے تحت ہی سب کو احتسابی کارروائیوں کا سامنا کرنا ہو گا۔