یہ اچھا نہیں، ٹکٹ بغیر زبردستی اسٹیڈیم داخل نہ ہوں، محمد نبی

عالمی کپ ٹی ٹوئنٹی کے گروپ ٹو کے ایک گروپ میچ میں پاکستان سے شکست کے بعد افغان قومی کرکٹ ٹیم کے کپتان کو کہنا پڑ گیا کہ افغان مداح ٹکٹ خرید کر ہی اسٹیڈیم کا رخ کریں۔

جمعے کے دن پاکستان اور افغانستان کے مابین میچ انتہائی پرجوش رہا، نہ صرف میدان میں دونوں ٹیموں کے کھلاڑیوں نے انتہائی شاندار کھیل کا مظاہرہ کیا بلکہ میدان میں موجود دونوں ممالک کے مداحوں نے بھی اپنی اپنی ٹیموں کو دل کھول کر داد دی۔ دبئی کرکٹ اسٹیڈیم کا سماں ایسا تھا کہ کانوں پڑی آواز سنائی نہیں دے رہی تھی۔

اس میچ میں افغان ٹیم کی شاندار کارکردگی نے ان کے مداحوں کے دل جیت لیے۔ تاہم میچ کے آخر میں محمد آصف کی کرشماتی بلے بازی نے اس میچ کا نتیجہ بدل دیا۔ ورنہ تو یوں بھی معلوم ہو رہا تھا کہ پاکستان یہ میچ ہار جائے گا۔

میچ کے دوران جہاں اسٹیڈیم کے اندر شائقین اپنی اپنی ٹیموں کی حوصلہ افزائی کر رہے تھے، وہیں اسٹیڈیم کے باہر بھی سماں دیدنی تھا۔ اس دوران کئی افغان مداحوں نے ٹکٹ کے بغیر ہی اسٹیڈیم میں داخل ہونے کی کوشش بھی کی۔

اس پیشرفت پر افغان قومی کرکٹ ٹیم کے کپتان محمد نبی نے مایوسی کا اظہار کیا اور اپنے مداحوں سے اپیل کی کہ وہ زبردستی اسٹیڈیم میں داخل ہونے کی کوشش نہ کریں۔ اس قبل افغانستان اور سکاٹ لینڈ کے مابین گروپ میچ میں بھی ایسی اطلاعات تھیں کہ کچھ افغان مداحوں نے ٹکٹ خریدے بغیر اسٹیڈیم میں داخل ہونے کی کوشش کی تھی۔

نبی نے کہا،'' افغان مداح، برائے مہربانی ٹکٹ خریدیں اور پھر اسٹیڈیم کا رخ کریں۔ ایسا دوبارہ مت کیجیے گا۔ یہ اچھا نہیں۔‘‘

دبئی اسٹیڈیم کے باہر موجود جن لوگوں نے ٹکٹ کے بغیر اسٹیڈیم میں داخلے کی کوشش کی انہوں نے افغان پرچم اٹھا رکھے تھے۔ سکیورٹی کی خاطر یوں پولیس نے میچ شروع ہونے کے ایک گھنٹے بعد اسٹیڈیم کے تمام دروازے بند کر دیے۔

انتظامیہ کے مطابق گراؤنڈ کے اندر کے ماحول کو محفوظ رکھنے کی خاطر یہ قدم اٹھایا  گیا تھا۔ تاہم اس بدنظمی کی وجہ سے کئی ایسے لوگ بھی اسٹیڈیم میں داخل ہونے سے محروم ہو گئے، جنہوں نے ٹکٹ خرید رکھے تھے کیونکہ بدنظمی کے بعد اسٹیڈیم کے گیٹ نہیں کھولے گئے۔

بین الاقوامی کرکٹ کونسل، انڈین کرکٹ بورڈ اور انگلش کرکٹ بورڈ نے ایسے مداحوں سے معذرت کی ہے، جو ٹکٹ خریدنے کے باوجود اسٹیڈیم میں نہیں جا سکے۔ ایسے لوگوں سے کہا گیا ہے کہ وہ اپنے ٹکٹ پروائڈر سے رابطہ کریں۔

بین الاقوامی کرکٹ کونسل نے اماراتی کرکٹ بورڈ سے کہا ہے کہ وہ جمعے کے رات رونما ہونے والے ان واقعات کا نوٹس لے اور مکمل انکوائری کی جائے تاکہ یقینی بنایا جا سکے کہ مستقبل میں اس طرح کا کوئی ناخوشگوار واقعہ رونما نہ ہو۔

ع ب ، ع ح (خبر رساں ادارے)