Шолц: „Заедништвото е наш најголем адут“

„Путин води имеријалистичка агресорска војна во срцето на Европа. Овој пресврт и нас и нашата земја нѐ става во искушение“, рече Олаф Шолц во традиционалното новогодишно обраќање на канцеларот.

„Сочувствуваме со Украинците кои ни во деновите како што е денешниот не можат да здивнат од руски бомби и ракети. А, последиците од војната ги чувствуваме во секојдневието, кога купуваме во супермаркет, на бензиска пумпа или плаќаме сметки за струја или за гас“, рече Шолц.

Тој додаде дека тука се кријат и добри вести. Руската војска не ја прегази Украина за неколку дена, како што планираше Путин, ЕУ и НАТО се обединети, а Германија не подлегна на уцените за рускиот гас.

„Не оставаме никого на цедило“

„Се работи за зедништво и за сила - и да, исто така, за самодоверба. Сите помогнавте во пишување на оваа приказна - секаде во нашата земја“, додаде канцларот.

Тој им се заблагодари на сите кои помагаат во прием и згрижување на воените бегалци, додавајќи оти ширум земјата 29 милиони луѓе доброволно и хуманитарно се ангажираат во разни организации. Тој ги пофали и оние кои работат на енергетската транзиција и за заштита на климата.

„Ова е земја во која никого не го оставаме на цедило - без разлика дали во град или на село, стари или млади, богати или помалку богати, без разлика дали се родени тука или подоцна се доселиле“, рече Шолц.

Нови мерки во Новата година

Германскиот канцелар потсети на новите пакети мерки за сузбивање на кризата, кои ќе стапат во сила од првиот ден на јануари. Во прашање се надоместоците за кирии за лицата со ниски примања, зголемување на детскиот додаток и вкупно 19 милијарди евра намалување на даноците, како и субвенционирани цени за струјата, парното и гасот.

„Почитувани сограѓани, нашето заедништво е нашиот најголем адут. Затоа на почетокот на оваа Нова година ни посакувам едно нешто: Да останеме верни на патот по кој тргнавме минатата година! Храбро да продолжиме понатаму“, заклучи Шолц.

Новогодишното обраќање на канцеларот традиционално се емитува во целосна должина на јавните сервиси во Германија на последниот ден од годината. Претходно за Бадник се емитува говорот на претседателот на државата.