پلټونکي: د روسیې يو لوړ پوړی جنرال په مسکو کې وژل سوی
۱۴۰۳ آذر ۲۷, سهشنبه
د روسیې د پلټونکو کمېټې خبر ورکړی دی چي د سې شنبې په سهار (۲۰۲۴م کال د ډسمبر ۱۷) د پلازمینې مسکو په جنوب ختیځ کي د استوگنې یوې ودانۍ ته نیژدې یوه چاودنه رامنځته سوه. په کیف کې د استخباراتي کړیو په وینا، د راډیو اکټیف، بیولوژیکي او کیمیاوي وسلو د بریدونو په وړاندې د دفاع له پاره د روسیې د ځواکونو قوماندان، ایګور کیریلوف، د اوکراین د پټو خدماتو SBU له خوا په "ځانګړو عملیاتو" کې ووژل سو. ویل کیږي چي په دغه چاودنه کي د هغه مرستیال هم وژل سوی دی.
لکه څنگه چي په هغه انځورونو کي چي روسي رسنیو خپاره کړي دي، لیدل کیږي چي د نوموړې ودانۍ د ننوتو دروازه سخته زیانمنه سوې ده او د ډیرو آپارتمانونو د کړکیو هندارې هم ماتې سوي دي.
بریتانیا په اکتوبر میاشت کي په اوکراین کي د کیمیاوي وسلو د کارولو له امله پر کیریلوف بندیزونه وضع کړل. د کریملن مشر ولادیمیر پوتین، د دوشنبې په ورځ وویل چي روسي ځواکونه د اوکراین په ټوله جبهه کي برتري لري.
پوتین دروسیې د پوځ له مشرتابه سره په یوه غونډه کې وویل چي د پوځ پرمختګ ګړندی سوی دی. ۲۰۲۴ کال په ګاونډي هیواد کې "هدفونو ته د رسیدو له پاره د بریدونو پریکړنده کونکی کال" دی.