بنگلہ دیش: اپوزیشن رہنما خالدہ ضیا ’موت کےخطرے سے دوچار‘

بنگلہ دیش میں ڈاکٹروں کے ایک پینل نے خبردار کیا ہے کہ اگر اپوزیشن رہنما خالدہ ضیاء کو مزید علاج کے لیے فوری طور پر بیرون ملک نہ بھجوایا گیا تو ان کے مرنے کا ''زیادہ خطرہ‘‘ ہے۔ ڈاکٹروں کی طرف سے یہ انتباہ بنگلہ دیشی حکام کی جانب سے خالدہ ضیا کی ملک چھوڑنے کی درخواست مسترد کیے جانے کے بعد سامنے آیا ہے۔

77 سالہ خالدہ ضیا دو مرتبہ بنگلہ دیش کی وزیر اعظم رہ چکی ہیں۔  وہ حزب اختلاف کی مرکزی جماعت بنگلہ دیش نیشنلسٹ پارٹی (بی این پی) کی سربراہ ہیں اور 2020 میں 17 سال کی قید کی سزا سے رہائی کے بعد سے گھر میں نظر بندی کی زندگی گزار رہی ہیں۔ وہ ذیابیطس اور دل کے مسائل کے ساتھ ساتھ جگر کی سوزش یا سیروسس کے عارضے کا شکار ہیں۔

ان کی حریف وزیر اعظم شیخ حسینہ واجد کی حکومت نے گزشتہ ہفتے خالدہ ضیا کے خاندان کی اس درخواست کو مسترد کر دیا تھا کہ انہیں جگر کی پیوند کاری کے لیے جرمنی جانے کی اجازت دی جائے۔

خالدہ ضیا اور حسینہ واجد کو بنگلہ دیش کی سیاست میں جنگجو بیگمات کے طور پر جانا جاتا ہے اور ان کی باہمی دشمنی 170 ملین آبادی والے اس جنوبی ایشیائی ملک کی سیاست پر چار دہائیوں سے زیادہ عرصے سے چھائی ہوئی ہے۔

بنگلہ دیشی دارالحکومت ڈھاکہ کے ایک اعلیٰ درجے کے نجی ہسپتال میں گزشتہ دو ماہ سے خالدہ ضیاء کا علاج کرنے والے 17 ڈاکٹروں کے ایک پینل نے ان کے  خاندان کی انہیں بیرون ملک منتقل کرنے کے موقف کی حمایت کرتے ہوئے کہا کہ ان کی حالت بگڑ رہی ہے۔ اس پینل میں ہیپاٹولوجسٹ نورالدین احمد نے صحافیوں کو بتایا، "وہ موت کے بڑھتے خطرے سے دوچار ہیں۔"  انہوں نے کہا کہ انفیکشن کی وجہ سے مریضہ کو سانس لینے میں دشواری ہو رہی ہے

  ڈاکٹروں کے پینل کے سربراہ ایف ایم صدیقی نے مزید کہا، ''بنگلہ دیش میں تمام آپشنز ختم ہو چکے ہیں، ہم مزید کچھ نہیں کر سکتے۔‘‘  خیال رہے کہ  بنگلہ دیش جنوری میں ہونے والے عام انتخابات کی تیاری کر رہا ہے اور اگر خالدہ ضیاء کی موت ہو جاتی ہے تو یہ ممکنہ طور پر اپوزیشن کے بڑے پیمانے پراحتجاج کو جنم دے گی۔

حسینہ کو آزادانہ اور منصفانہ انتخابات کے انعقاد کے لیے مغربی طاقتوں کے بڑھتے ہوئے دباؤ کا سامنا ہے۔ یہ انتخابات خالدہ ضیاء کی ملکی پارلیمانی سیاست میں دوبارہ سر اٹھانے والی بی این پی کی واپسی کا سبب بن سکتے ہیں۔ امریکہ، یورپی یونین اور انسانی حقوق کی تنظیموں نے ایک ایسے ملک میں سیاسی ماحول پر تشویش کا اظہار کیا ہے، جہاں حسینہ واجد گزشتہ 15 سالوں سے اقتدار میں ہیں اور ان کی عوامی لیگ کی جماعت مقننہ پر حاوی ہے اور  پارلیمان کو عملی طور پر ربڑ سٹیمپ کی طرح چلا رہی ہے۔

خالدہ ضیاء کو  2018 میں بدعنوانی کے الزام میں 17 سال قید کی سزا سنائی گئی تھی اور بھاری پابندیوں کے تحت رہائی سے قبل وہ دو سال کے لیے جیل میں بھی رہیں۔ خالدہ ضیا ان الزامات کو سیاسی قرار دے کر مسترد کرتی ہیں۔

ش ر⁄ ع ب (اے ایف پی)