عبوری وزیر اعظم کے طور پر شاہد خاقان عباسی کی نامزدگی

پاکستانی دارالحکومت اسلام آباد سے مغربی یورپی وقت کے مطابق ہفتہ انتیس جولائی کی سہ پہر ملنے والی مختلف نیوز ایجنسیوں کی رپورٹوں کے مطابق پاکستانی پارلیمان کے قومی اسمبلی کہلانے والے ایوان زیریں میں واضح اکثریت کی حامل اور ملکی سطح پر حکمران سیاسی جماعت پاکستان مسلم لیگ نون کے پارلیمانی حزب کا ایک اجلاس آج انتیس جولائی کی شام مقامی وقت کے مطابق شام چار بجے شروع ہوا، جس کا مقصد یہ طے کرنا تھا کہ موجودہ اسمبلی کے اندر ہی حکومتی تبدیلی کے لیے حزب اقتدار کی سربراہی کرتے ہوئے نیا وزیر اعظم اسی جماعت کے کس رہنما کو بنایا جائے گا۔

ساتھ ہی مسلم لیگ نون کے اس پارلیمانی پارٹی اجلاس میں یہ بھی طے کیا جانا تھا کہ اب تک وزیر اعظم چلے آ رہے نواز شریف کی پارلیمانی نااہلی کے عدالتی فیصلے کے بعد اس سیاسی جماعت کا آئندہ کا لائحہ عمل کیا ہو گا۔

نواز شریف کے جانشین وزیر اعظم کی پارٹی نامزدگی آج شام

نواز حکومت کا خاتمہ: ’پاک چین اقتصادی راہداری خطرے میں نہیں‘

نواز شریف کی نااہلی کے بعد مستقبل کا پارٹی منظر، مشاورت جاری

جرمن نیوز ایجنسی ڈی پی اے کے مطابق پاکستان میں نواز شریف کے خلاف عدالتی فیصلے کے فوراﹰ بعد ہی سے یہ چہ مگوئیاں زوروں پر تھیں کہ ملکی وزیر اعظم کے طور پر نواز شریف کا 'مستقل‘ جانشین ان کے چھوٹے بھائی اور پنجاب کے موجودہ وزیر اعلیٰ شہباز شریف کو بنایا جائے گا۔

لیکن شہباز شریف اس وقت چونکہ پنجاب اسمبلی کے رکن ہیں، اس لیے پہلے ان کے استعفے کے بعد انہیں نواز شریف کی لاہور سے قومی اسمبلی کی نشست این اے ایک سو بیس سے الیکشن لڑوایا جائے گا اور پھر ممکنہ کامیابی کے بعد قومی اسمبلی کے رکن کے طور پر ہی وہ نئے ملکی وزیر اعظم بن سکیں گے۔ اس پارٹی اجلاس میں شریک ایک مرکزی رہنما نے روئٹرز کو بتایا کہ اب اگلے قریب ڈیڑھ دو ماہ تک مسلم لیگ نون ہی کے ایک رہنما اور سابق وزیر پٹرولیم شاہد خاقان عباسی اس پارٹی کے پارلیمانی گروپ کے عبوری سربراہ رہیں گے اور پھر شہباز شریف کے قومی اسمبلی میں پہنچ جانے کے بعد عباسی یہ عہدہ شہباز شریف کے لیے خالی کر دیں گے، جو اگلے عام انتخابات تک وزیر اعظم رہیں گے۔

عبوری وزیر اعظم کے طور پر پارٹی نامزدگی کے لیے شاہد خاقان عباسی کے ساتھ ساتھ سابق وزیر دفاع خواجہ آصف کے علاوہ چند دیگر پارٹی لیڈر بھی ممکنہ انتخاب قرار دیے جا رہے تھے لیکن آج کے اجلاس میں مسلم لیگ نون کے پارلیمانی دھڑے نے اپنا فیصلہ عباسی کے حق میں دے دیا۔

58 سالہ شاہد خاقان عباسی مسلم لیگ نون کے ایک اہم مرکزی رہنما اور نواز شریف کے بہت مخلص سیاسی ساتھی سمجھے جاتے ہیں۔

ڈی پی اے کے مطابق مسلم لیگ نون کے پارلیمانی گروپ کی طرف سے شاہد خاقان عباسی کے اپنے نئے رہنما کے طور پر انتخاب کے بعد اب ملکی صدر ممنون حسین قومی اسمبلی کا ایک جلاس بلائیں گے، جس میں ایوان زیریں کے اراکین باقاعدہ طور پر عباسی کو نیا وزیر اعظم منتخب کر لیں گے۔ قومی اسمبلی میں نون لیگ کی واضح اکثریت کے باعث عباسی کو نیا سربراہ حکومت بنوانا پارٹی کے لیے کوئی مشکل کام نہیں ہو گا۔

پاناما سے اقامہ تک، نواز شریف کا احتساب: تبصرہ

نا اہلی کے بعد: نواز شریف کے پاس قانونی اور سیاسی آپشنز کیا ہیں؟

نواز شریف نا اہل، ملک میں سیاسی ہلچل

ڈی پی اے نے مزید لکھا ہے کہ 67 سالہ سابق وزیر اعظم نواز شریف اب دوبارہ پارلیمان کے رکن تو نہیں بن سکتے لیکن وہ آئندہ بھی اپنی پارٹی کے سربراہ رہیں گے اور اسی حیثیت میں وہ دراصل اپنے ایک 'فرنٹ مین‘ کے ذریعے، جو قریب دو ماہ بعد ان کے 65 سالہ چھوٹے بھائی شہباز شریف ہوں گے، مستقبل میں بھی بالواسطہ طور پر حکمرانی کرتے رہیں گے۔

نیوز ایجنسی روئٹرز کے مطابق اسلام آباد میں جاری مسلم لیگ نون کے پارلیمانی دھڑے کے اجلاس میں عبوری وزیر اعظم کے طور پر شاہد خاقان عباسی کو نامزد کرنے کے علاوہ یہ باقاعدہ فیصلہ بھی کر لیا گیا کہ طویل المدتی بنیادوں پر پاکستان کی پارلیمانی سیاست میں نواز شریف کے عملی جانشین شہباز شریف ہی ہوں گے۔ یوں اس حوالے سے ماہرین کے دونوں اندازے درست ثابت ہوئے ہیں۔

پاکستان مسلم لیگ نون کی پارلیمانی پارٹی کے آج کے اجلاس سے سابق وزیر اعظم نواز شریف نے بھی تفصیلی خطاب کیا، جس دوران انہوں نے ملکی سپریم کورٹ کے ہاتھوں اپنی نااہلی کے تناظر میں اس حوالے سے مفصل اظہار خیال کیا کہ انہوں نے کوئی غلط کام نہیں کیا تھا اور نہ ہی کوئی کرپشن کی تھی۔