اسرائیلی اقدام پر یورپی ممالک کا رد عمل

خبر رساں ادارے روئٹرز کے مطابق فرانسیسی صدر ایمانویل ماکروں نے منگل 15 مئی کی شام اسرائیلی وزیر اعظم بینجمن نیتن یاہو سے ٹیلی فون پر بات کی اور غزہ میں ہونے والے تشدد کی مذمت کی۔ ان کی طرف سے یہ مذمت پیر اور منگل کے روز غزہ اسرائیل سرحد پر اسرائیلی فوجیوں کی فائرنگ کے نتیجے میں 60 فلسطینیوں کی ہلاکت پر کی گئی۔

فلسطینی بےدخلی کی برسی، امریکی سفارتخانہ، تباہ کن ٹرمپ: تبصرہ

فلسطین میں آج جنازوں کا دن

فرانس کے صدارتی دفتر سے جاری ہونے والے بیان کے مطابق، ’’انہوں (ماکروں) نے غزہ کی صورتحال پر اپنے شدید تحفظات کا اظہار کیا اور عام شہریوں کے تحفظ اور ان کی طرف سے پر امن احتجاج کی اہمیت کو اجاگر کیا۔‘‘

بیلجیم کی طرف سے اسرائیلی سفیر طلب اور غزہ پر انکوائری کا مطالبہ

بیلجیم نے منگل کے روز غزہ میں ہونے والے تشدد پر اقوام متحدہ کی طرف سے تحقيقات کا مطالبہ کیا۔ ساتھ ہی بیلجیم میں تعینات اسرائیلی سفیر کی طرف سے تمام فسلطینیوں کو ’’دہشت گرد‘‘ قرار دینے پر انہیں ملکی وزارت خارجہ طلب کر لیا گيا۔

بیلجیم کے وزیر اعظم چارلس مچل نے امریکی سفارت خانے کو تل ابیب سے یروشلم منتقل کرنے کے موقع پر ہونے والے مظاہروں کے دوران اسرائیلی فوج کی فائرنگ سے 60 فلسطینیوں کی ہلاکت کی تحقیقات کرانے کا مطالبہ کیا۔ منگل کے روز اس حوالے سے جاری ہونے والے بیان میں کہا گیا، ’’غزہ پٹی میں گزشتہ روز ہونے والا تشدد ناقابل قبول ہے۔ ہم اقوام متحدہ کی سربراہی میں بین الاقوامی انکوائری کا مطالبہ کرتے ہیں۔‘‘

سخت الفاظ میں جاری کردہ اس بیان میں مزید کہا گیا ہے کہ اسرائیلی فوج کا سویلینز کے خلاف یہ کریک ڈاؤن ’’طاقت کا بے جا استعمال‘‘ ہے اور ’’مظاہرین پر گولیاں برسانا شرمناک‘‘ ہے۔

بیلجیم کی وزارت خارجہ نے امریکا کی طرف سے اپنا سفارت خانہ تل ابیب سے یروشلم منتقل کرنے اور یروشلم کو اسرائیل کا دارالحکومت تسلیم کرنے کے فیصلے کو بھی تنقید کا نشانہ بناتے ہوئے کہا ہے کہ اس اقدام سے امن کے قیام سے مزید دشواری ہو گی۔

بیلیجم کے وزارت خارجہ نے خبر رساں ادارے اے ایف پی کو بتایا کہ بیلجیم میں اسرائیلی سفیر سیمونا فرینکل کو وزارت خارجہ میں طلب کر کے ان سے ان کے الفاظ کی وضاحت مانگی گئی۔

خاتون سفیر نے بیلجیم کے براڈکاسٹر RTBF سے گفتگو کرتے ہوئے کہا تھا، ’’میں واقعی ہر انسانی جان کے ضياع پر افسوس کا اظہار کرتی ہوں، بھلے ان کی قومیت کچھ بھی ہو، یا پھر وہ دہشت گرد ہی کیوں نہ ہوں۔‘‘

برطانوی وزیر اعظم کی طرف سے غزہ سرحد پر تحمل کی ضرورت پر زور

برطانوی وزیر اعظم ٹریزا مے نے غزہ سرحد پر 60 فسلطینیوں کی ہلاکت پر منگل کے روز  فریقین کو صبر و تحمل کی تلقین کی۔ برطانیہ کے دورے پر پہنچے ترک صدر رجب طیب کے ساتھ میڈیا سے گفتگو کرتے ہوئے مے کا کہنا تھا، ’’اس طرح کا تشدد امن کی کوششوں کے لیے تباہ کُن ہے اور ہم تمام فریقوں سے مطالبہ کرتے ہیں کہ وہ تحمل سے کام لیں۔‘‘

اس موقع پر ٹریزا مے کا مزید کہنا تھا، ’’ہم اس پر سوال نہیں اٹھاتے کہ اسرائیل کو اپنی سرحدوں کے تحفظ کا حق حاصل ہے مگر اصلی گولیوں کا استعمال اور اس کے نتیجے میں انسانی زندگیوں کا ضياع انتہائی افسوسناک ہے۔ ہم اسرائیل سے مطالبہ کرتے ہیں کہ وہ تحمل سے کام لے۔‘‘

ا ب ا / ع س (خبر رساں ادارے)