ناکافی وقت: نواز شریف کے وکلاء احتجاجاﹰ مقدمے سے الگ

جرمن خبر رساں ادارے ڈی پی اے کے مطابق پاکستان کے سابق وزیر اعظم نواز شریف کے وکلاء نے احتجاجاﹰ یہ فیصلہ اس لیے کیا کہ ملکی سپریم کورٹ نے مقدمے کی کارروائی مکمل کرنے کے لیے جو نئی ڈیڈ لائن مقرر کی ہے وہ 10 جولائی ہے جو آئندہ قومی انتخابات سے دو ہفتے قبل ہے۔

گ‍زشتہ برس سپریم کورٹ ہی کی طرف سے نااہل قرار دیے جانے والے نواز شریف کو اپنے خلاف منی لانڈرنگ، ٹیکس چوری اور غیر ممالک میں ایسے جائیدادیں بنانے کے الزامات کا سامنا ہے، جو انہوں نے ظاہر نہیں کی تھیں۔

سپریم کورٹ کو اس مقدمے کی سماعت اسی ہفتے پوری کرنا تھی، تاہم نواز شریف کے وکلاء کی طرف سے عدالت سے درخواست کی گئی تھی کہ وہ اس کے لیے کوئی حتمی تاریخ مقرر نہ کرے۔ عدالت نے یہ درخواست مسترد کرتے ہوئے اس کی سماعت مکمل کرنے کی ڈیڈ لائن 10 جولائی تک بڑھا دی۔

نواز شریف کے وکلا کی ٹیم کے سربراہ خواجہ حارث نے صحافیوں سے گفتگو میں کہا، ’’ہم نے فیصلہ کیا ہے کہ ہم اس مقدمے کی سماعت میں حصہ نہیں لیں گے کیونکہ اس مقدمے کو نمٹانے کی حتمی تاریخ کو غیر معینہ مدت تک بڑھانے کی ہماری درخواست کو مسترد کر دیا گیا ہے۔‘‘

بعض سیاسی تجزیہ کاروں کا خیال ہے کہ پاکستان کی فوج نواز شریف کے خلاف مقدمات میں عدلیہ پر اثر انداز ہو رہی ہے۔ اگر 25 جولائی کو طے شدہ عام انتخابات سے قبل عدالت کی طرف سے نواز شریف کے خلاف کوئی فیصلہ آ جاتا ہے، تو اس سے ان کی جماعت کی کامیابی کے امکانات متاثر ہو سکتے ہیں۔

ا ب ا / م م (ڈی پی اے)