یورپی یونین کے نئے بجٹ میں کٹوتی کا فیصلہ

یورپی یونین کی رکن ریاستوں کی تعداد 27 ہے اور انہوں نے اس پر اتفاق کیا ہے کہ یورپی یونین کے اگلے سال کے بجٹ میں کم از کم چار ارب یورو کی کٹوتی کردی جائے۔ ان ریاستوں میں یونین کے اگلے سال کے بجٹ کے لئے مختص رقم پر بھی رضامندی سامنے آ ئی ہے۔ یورپی یونین کا سن 2011 کا بجٹ 126ارب یورو سے زائد ہے۔ جٹ کی جو ابھی تک صورت بنی ہے، اب اس پر یورپی پارلیمنٹ میں بحث ہو گی اور کمیشن کے ساتھ مذاکراتی عمل بھی جاری رکھا جائے گا۔ بجٹ کی منظوری اکتوبر میں متوقع ہے۔

کم بجٹ کی تجویز پر ڈنمارک اور برطانیہ نے دستخط کرنے سے انکار کردیا ہے۔ اس انکار سے یورپی یونین کے گزشتہ سال کے بجٹ میں تقریباً تین فی صد کا خود بخود اضافہ متوقع ہے۔ لندن میں ڈنمارک کے وزیر اعظم لارس لوئکے راسموسن اور برطانوی وزیر اعظم ڈیوڈ کیمرون کے درمیان اتفاق ہے کہ بجٹ میں اگر اضافہ ممکن نہیں تو ایک مناسب رفتار کے ساتھ کمی کی جائے۔ دونوں وزرائے اعظم نے ایک ساتھ بڑی کمی کو نامناسب خیال کیا ہے۔

یورپی یونین کے سالانہ بجٹ میں دو ارب یورو کی کٹوتی غریب یورپی ملکوں کی جانب سے سامنے آئی ہے۔ فرانس کی جانب سے آٹھ سو ملین کی کمی کا عندیہ سامنےآیا ہے۔ ممبر ملکوں نے یورپی یونین کے ملازمین کی تنخواہوں میں ممکنہ اضافے کے مطالبے کو قبول نہیں کیا۔ یہ معاملہ خاصی تکرار کا باعث بنا ہوا ہے اور اس بارے میں ایک اپیل یورپی عدالت برائے انصاف میں دائر ہے۔ یہ ممالک نئی بھرتی کی بھی مخالفت کر رہے ہیں۔ یونین نے اس مخالفت کے تناظر میں نئی آسامیوں کو منجمد کردیا ہے۔ اس کے علاوہ یورپی یونین کے اخراجات میں بھی تین چوتھائی کمی کا براہ راست مطالبہ سامنے آیا ہے۔ اس حوالے سے برطانوی وزیر اعظم کا کہنا ہے کہ ممبر ملکوں اور یونین کے درمیان مشکل بات چیت کا دور شروع ہونے والا ہے۔

ماہرین کا خیال ہے کہ اگر کٹوتی کا عمل ممکن ہو جاتا ہے تو اس سے یورپی یونین کی عالمی سرمایہ کاری کی ان کوشش کو ضرب پہنچ سکتی ہے جو بطور گلوبل لیڈر کے ادا کرنے کی ضرورت ہے۔ ان کا مزید کہنا ہے کہ ممبر ملکوں کی جانب سے بجٹ میں کمی شاید عالمی کساد بازاری اور اقتصادی ترقی کی شرح میں سست رفتاری کے تناظر میں کیا گیا ہے۔

رپورٹ: عابد حسین

ادارت: ندیم گِل