آئی ایم ایف کا پاکستان سے ’فنڈنگ کی یقین دہانیوں‘ کا مطالبہ

امریکی نیوز ٹی وی بلومبرگ نے ہفتہ پندرہ اپریل کے روز اپنی نشریات میں بتایا کہ آئی ایم ایف نے پاکستان سے اسے دیگر ذرائع سے ملنے والے مالی وسائل سے متعلق ’ضروری یقین دہانیوں‘ کا مطالبہ کر دیا ہے، جن کے مہیا کیے جانے کے بعد ہی اس جنوبی ایشیائی ملک کے لیے پہلے سے طے شدہ بیل آؤٹ پیکج کے تحت 1.1 بلین ڈالر کی اگلی قسط کی جلد از جلد فراہمی کا معاملہ طے پا سکے گا۔

فنڈ کے پاکستان مشن چیف کے بیان کا حوالہ

خبر رساں ادارے روئٹرز نے اس بارے میں لکھا ہے کہ پاکستانی حکومت اور آئی ایم ایف کے مابین ہونے والے مذاکرات میں یہ اتفاق رائے ہو گیا ہے کہ اسلام آباد کو جن مالی وسائل کی اشد ضرورت ہے، ان کی ترسیل کے سلسلے میں پاکستان کو اپنے ہاں نہ صرف سخت پالسیاں درکار ہیں بلکہ ان سخت پالیسیوں پر تسلسل سے عمل درآمد بھی کیا جانا چاہیے۔

متحدہ عرب امارات نے پاکستان کو ایک ارب ڈالر کی امداد دینے کی تصدیق کر دی، وزیر خزانہ

بلومبرگ نیوز نے یہ تفصیلات بتاتے ہوئے نیتھن پورٹر کے ایک بیان کا حوالہ بھی دیا۔ نیتھن پورٹر آئی ایم ایف کے پاکستان مشن کے سربراہ ہیں۔

پاکستانی پارلیمان اور عدلیہ کے مابین رسہ کشی، اونٹ کس کروٹ بیٹھے گا؟

نیو یارک سے موصولہ رپورٹوں کے مطابق بین الاقوامی مالیاتی فنڈ پاکستان کی اپنے اقتصادی اور مالیاتی حالات بہتر بنانے کے لیے کی جانے والی کوششوں کی حمایت کرتا ہے۔

اس کے علاوہ آئی ایم ایف یہ امید بھی کرتا ہے کہ اسلام آباد میں وزیر اعظم شہباز شریف کی حکومت جلد ہی فنڈنگ سے متعلق 'ضروری‘ یقین دہانیاں حاصل کر کے اس فنڈ کو مہیا کرے گی، تاکہ پاکستان کو جس اگلی مالی قسط کی ادائیگی رکی ہوئی ہے، وہ جتنا جلد ممکن ہو، مہیا کی جا سکے۔

پاکستانی معیشت: شرح نمو کم تر، بےروزگاری زیادہ، آئی ایم ایف

پاکستانی معیشت میں ’شرح نمو کم تر، بے روزگاری اور زیادہ‘

اسی ہفتے بین الاقوامی مالیاتی فنڈ نے پاکستانی معیشت کی آئندہ کارکردگی سے متعلق اپنے جو تازہ ترین اعداد و شمار جاری کیے تھے، ان میں 2023ء کے دوران اقتصادی ترقی کی متوقع شرح مزید کم کر کے صرف 0.5 فیصد کر دی گئی تھی۔ اس سے قبل 2022ء میں یہ شرح نمو چھ فیصد رہی تھی۔

بیرون ملک پاکستانیوں نے مارچ میں ڈھائی ارب ڈالر وطن بھیجے

آئی ایم ایف نے پاکستان سے متعلق اپنے تازہ ترین ڈیٹا میں یہ پیش گوئی بھی کی کہ اس ملک میں افراط زر کی شرح اس سال بھی بہت زیادہ رہے گی، جو تقریباﹰ 27 فیصد ہو گی۔

ساتھ ہی اس بین الاقوامی مالیاتی ادارے نے یہ تنبیہ بھی کی تھی کہ پاکستان میں، جس کی آبادی کا بہت بڑا حصہ نوجوانوں پر مشتمل ہے، بے روزگاری بھی مسلسل بڑھتی رہے گی۔

م م / ع ت (روئٹرز، اے پی)