آسٹریا میں تارکین وطن کی یومیہ حد مقرر

آسٹریا کی وزیرداخلہ یوہانا مِکل لائٹنر کا کہنا ہے کہ حکومت نے اپنی سرزمین سے گزر کر جرمنی اور دیگر مغربی یورپی ممالک کا رخ کرنے والے تارکین وطن کی یومیہ حد مقرر کر دی گئی ہے۔ اب روزانہ 3200 پناہ گزین آسٹریا کے ذریعے دیگر ممالک کا سفر کر سکیں گے۔

مایوس مہاجرین آسٹریا سے اپنے اپنے وطن واپس جانے لگے

یورپی بیت الخلاء، کئی مہاجرین کے لیے معمہ

لائٹنر کا کہنا تھا کہ بتیس سو تارکین وطن کی یہ یومیہ حد ان تارکین وطن پر لاگو ہو گی جو جرمنی اور دیگر پڑوسی ممالک میں سیاسی پناہ حاصل کرنے کے خواہش مند ہیں۔

ویانا حکومت کا یہ بھی کہنا ہے کہ آسٹریا میں روزانہ سیاسی پناہ کی 80 درخواستیں قبول کی جائیں گی۔ لائٹنر کا یہ بھی کہنا تھا کہ ان فیصلوں کا اطلاق جمعہ 19 فروری سے ہو جائے گا۔

اس سے قبل آسٹریا نے یہ اعلان بھی کیا تھا کہ سلووانیہ، ہنگری اور اٹلی سے متصل سرحدوں پر تیرہ سرحدی چوکیاں قائم کی جا رہی ہیں۔ ان اقدامات کا مقصد ان ممالک کے ذریعے آسٹریا میں داخل ہونے والے پناہ گزینوں کی نقل و حرکت محدود کرنا ہے۔

آسٹرین وزیر داخلہ کا کہنا تھا، ’’یورپی یونین کے تمام ممالک سے زیادہ دباؤ آسٹریا پر ہے اور اب ہم مزید بوجھ برداشت نہیں کر سکتے۔ ابھی تک اس بحران کا کوئی یورپی حل سامنے نہیں آ سکا ہے اسی لیے ہم اپنی سرحدیں محفوظ بنانا چاہتے ہیں۔‘‘

نئی حد مقرر کرنے کے بعد بھی آسٹریا میں سالانہ 29 ہزار تارکین وطن سیاسی پناہ کی درخواستیں دے سکیں گے۔ جب کہ گیارہ لاکھ 68 ہزار پناہ گزین آسٹریا سے گزر کر دیگر ممالک جا سکیں گے۔

گزشتہ برس گیارہ لاکھ سے زائد پناہ گزین بلقان ریاستوں اور آسٹریا سے گزر کر جرمنی، ناروے، سویڈن، ہالینڈ اور فرانس جیسے ممالک میں پناہ حاصل کرنے کے لیے پہنچے تھے۔

آسٹریا میں 90 ہزار تارکین وطن نے سیاسی پناہ کی درخواست دی تھی۔ ویانا حکومت نے حال ہی میں اعلان کیا تھا کہ رواں برس کے دوران 37500 تارکین وطن کی سیاسی پناہ کی درخواستیں قبول کی جائیں گی۔

برسلز میں آج شروع ہونے والے یورپی یونین کے سربراہ اجلاس سے قبل آسٹریا نے ہنگری، پولینڈ، سلوواکیہ اور چیک جمہوریہ کے مؤقف کی تائید کی ہے۔

آسٹریائی چانسلر ویرنر فیمان نے بدھ کے روز اپنے ایک انٹرویو میں کہا تھا کہ وہ مہاجرین کی یورپی یونین میں تقسیم کے منصوبے کی مخالفت کریں گے تاہم انہوں نے میرکل کی قیادت میں ترکی کے ساتھ طے پانے والی ڈیل کی حمایت کا اعلان بھی کیا۔

تارکین وطن کی یومیہ حد مقرر کرنے کے حوالے سے فیمان کا کہنا تھا، ’’ہم نے یہ کر دیا ہے اور مجھے یقین ہے کہ ہم نے ایک ایسی مثال قائم کر دی ہے جس کی تقلید عنقریب جرمنی بھی کرے گا۔‘‘