افغانستان: غير ملکی دستوں کی کمان جنرل اسکاٹ مِلر کے سپرد

امريکی فوج کے جنرل اسکاٹ ملر نے شورش زدہ ملک افغانستان ميں تعينات نيٹو اور امريکی افواج کے نئے سربراہ کے طور پر اتوار دو ستمبر کے دن کمان سنبھال لی ہے۔ اس موقع پر دارالحکومت کابل ميں منعقدہ ايک تقريب ميں ملر نے کہا، ’’کاميابی کے ليے، ہميں دشمن کے ماحول اور حکمت عملی کے بارے ميں مسلسل سيکھنا اور اپنا طريقہ ہائے کار بدلنا ہو گا۔‘‘ انہوں نے کہا کہ غير ملکی دستوں کے پاس غفلت کی کوئی گنجائش نہيں۔

جنرل اسکاٹ ملر نے جنرل جان نکلسن کی جگہ يہ ذمہ داری سنبھالی ہے، جو سن 2015 سے افغانستان ميں نيٹو اور امريکی افواج کے سربراہ مقرر تھے۔ نکلسن کی طرح ملر نے بھی غير ملکی دستوں کی کمان سنبھالنے سے قبل کئی سال افغانستان ميں گزارے۔ امريکا ميں گيارہ ستمبر سن 2001 کے دہشت گردانہ حملوں کے بعد طالبان کے خلاف آپريشن کے ليے دستوں کو افغانستان روانہ کيا گيا تو اسکاٹ ملر ان ميں شامل تھے۔ پھر ايک دہائی بعد جب اس وقت کے امريکی صدر باراک اوباما نے طالبان کو کچلنے کے ليے نيٹو کے ايک لاکھ افواج کے ساتھ پر زور کارروائياں شروع کيں، تو ملر ان کا بھی حصہ تھے۔ واشنگٹن حکومت اب يہ بات تسليم کر چکی ہے کہ افغانستان ميں اس بغاوت کا مکمل عسکری حل نہيں ہے۔ ليکن مذاکرات کا سلسلہ بھی زيادہ آگے نہيں بڑھ رہا اور اسی ليے صدر ڈونلڈ ٹرمپ کی اس معاملے پر بے چينی بڑھتی جا رہی ہے۔

کابل ميں اتوار کے روز تقريب سے خطاب کرتے ہوئے جنرل اسکاٹ ملر کے پيش رو جنرل نکلسن نے کہا، ’’ميرا يہ ماننا ہے کہ چند طالبان امن چاہتے ہيں ليکن ان پر زور ڈالا جا رہا ہے کہ وہ لڑائی جاری رکھيں۔‘‘ ان کا باغيوں سے مخاطب ہو کر کہنا تھا کہ وہ افغان عوام کی امن کی پکاريں اور ان کغ مطالبات سنيں۔ نکلسن نے کہا، ’’افغانستان ميں جنگ کے خاتمے کا وقت آ گيا ہے۔‘‘

ع س / ع ت، نيوز ايجنسياں