ایران سے جرمنی آنے والے طیارے کے لینڈنگ گیئر سے لاش برآمد

جرمن پولیس کا کہنا ہے کہ ایرانی دارالحکومت تہران سے جرمن شہر فرینکفرٹ آنے والے ایک طیارے کے لینڈنگ گیئر والے حصے میں ایک لاش ملی ہے۔جرمن اخبار بِلڈ کی ایک رپورٹ کے مطابق جرمن کمپنی لفتھانزا کے ایئربس طیارے نے جمعرات کی صبح تہران سے اڑان بھری تھی۔

جرمن طیارے کی تباہی، ’چیخیں بالکل آخر میں سنائی دیتی ہیں‘

پولیس نے بتایا کہ فرینکفرٹ ایئر پورٹ پر کام کرنے والے زمینی عملے کے ارکان کو طیارے کی دیکھ بھال کا کام کرتے ہوئے یہ  لاش ملی۔ جرمن مقامی نشریاتی ادارے Hessenschau نے بتایا کہ لاش ملنے سے قبل اس طیارے پر چار گھنٹے تک کام کیا جاتا رہا تھا۔

پولیس نے لاش کی تصدیق نہیں کی اور نہ ہی اس شخص کی شناخت کے بارے میں کوئی تفصیلات فراہم کی ہیں۔ جرمن خبر رساں ادارے ڈی پی اے کے مطابق لفتھانزا کے اس طیارے کی جمعے کی صبح کے لیے طے شدہ پرواز کو منسوخ کر دیا گیا ہے۔ جرمنی میں ایرانی نژاد افراد کی ایک بڑی آبادی ہے، جن میں سے ہزاروں افراد ہفتے کے روز برلن کی سڑکوں پرایران میں جاری حکومت مخالف مظاہروں کے ساتھ اظہار یکجہتی کے لیے ھی نکلے تھے۔

جرمن وزیر خارجہ انالینا بیئرباک نے بھی تہران کے خلاف تعزیری اقدام کے طور پر ایرانی شہریوں کے جرمنی میں داخلے پر پابندیاں عائد کرنے کے منصوبے کا اعلان کیا ہے۔

کسی طیارے کے لینڈنگ گیئر سے انسانی لاش ملنے کا یہ پہلا واقعہ نہیں ہے۔ اس قبل بھی اس نوعیت کے حادثات رپورٹ کیے جا چکے ہیں۔ ان واقعات میں معاشی طور پر کمزور اور جنگ زدہ ملکوں کے باشندے امریکہ اور یورپی ممالک میں پناہ کے متلاشی ہوتے ہیں۔ گزشتہ برس بھی اس طرح کے الگ الگ دو واقعات منظر عام پر آئے تھے۔

اگست سن دو ہزار اکیس میں طالبان کے افغانستان پر قبضے کے بعد عام افغان شہریوں کی بڑی تعداد کابل کے ہوائی اڈے پر کئی دن تک ہجوم کی شکل میں موجود رہی اور وہاں سے انخلا کے لیے سر توڑ کوششیں کرتے رہے۔ اس دوران ایسے مناظر بھی دیکھنے میں آئے جہاں افغان شہری امریکی فوجی جہازوں کے اڑان بھرنے سے پہلے ان کے ساتھ رن وے پر دوڑتے تھے اور کچھ افغانوں نے ان طیاروں کے ساتھ لٹکنے کی کوششوں کے دوران اپنی جانیں کھو دی تھیں۔

افغانستان سے انخلا تاریخ کا مشکل ترین آپریشن ہے، جو بائیڈن

اسی دوران امریکی ایئر فورس کی جانب سے ایک بیان جاری کیا گیا تھا، جس کے مطابق کابل ایئر پورٹ سے قطری دارالحکومت دوحہ لینڈ کرنے والے ایک امریکی فوجی طیارے کے لینڈنگ گیئر سے ایک نوجوان افغان شہری کی لاش ملی تھی۔ اس طرح گزشتہ برس نائیجریا کے شہر لاگوس سے ایمسٹر ڈیم آنے والی پرواز کے لینڈنگ گیئر سے بھی ایک نائجیرین نوجوان کی لاش ملی تھی۔

ش ر ⁄ ع ا (ڈی پی اے)