بنڈس لیگا: پہلا میچ ڈے مکمل

بنڈس لیگا کے پہلے میچ ڈے کے آخری دن رواں سیزن کے لیے شروع ہونے والی قومی لیگ کے آخری دونوں میچوں میں اپ سیٹ سامنے آئے۔ ایک میچ میں ریکارڈ ساز کلب بائرن میونخ کو شکست ہوئی تو دوسرے میچ میں گزشتہ سال بنڈس لیگا کی رنراپ ٹیم لیور کوزن کو ہار کا سامنا کرنا پڑا۔

جرمن کلب بائرن میونخ بنڈس لیگا کی تاریخ میں کئی کارناموں کا حامل کلب تصور کیاجاتا ہے۔ اتوار کے روز نامی گرامی کھلاڑیوں سے سجی بائرن میونخ کی ٹیم کو مؤنشن گلاڈ باخ سے ایک گول سے شکست کا سامنا کرنا پڑا۔ وقفے تک یہ میچ بغیر کسی گول کے برابر تھا۔ فیصلہ کن گول میچ کے دوسرے ہاف کے باسٹھویں منٹ میں ہوا۔ گول کی وجہ گول کیپر مانوئیل نوئر اور دفاعی کھلاڑی ژروم بوایٹنگ کے درمیان مکس اپ تھا۔ مؤنشن گلاڈ باخ کی جانب سے یہ گول بیلجیئم سے تعلق رکھنے والے برازیلوی نژاد ایگور ڈا کمارگو نے کیا۔ یہ امر اہم ہے کہ بائرن میونخ کے گول کیپر اور دفاعی کھلاڑی کی اس سیزن میں مالیت 35 ملین یورو ہے۔ گزشتہ سیزن میں مؤنشن گلاڈ باخ بمشکل تنزلی کو بچا سکی تھی۔ اس کامیابی پر بائرن میونخ کی ٹیم تین قیمتی پوائنٹس کے حصول میں ناکام رہی۔

اتوار کے روز کھیلے جانے والے دوسرے میچ میں گزشتہ سال چیمپیئن شپ میں دوسری پوزیشن حاصل کرنے والے کلب لیورکوزن کی شکست کی کہانی ہے۔ لیورکوزن کو فٹ بال کلب مائنز نے دو گول سے ہرایا۔ لیور کوزن تمام تر کوششوں کے باوجود مائننز کلب کے خلاف میچ برابر نہیں کر سکی۔ مائنز کی جانب سے پہلا گول پہلے ہاف کے بتیسویں منٹ میں سامی آلاگوئی نے کیا۔ دوسرا گول دوسرے ہاف کے دوران بیاسویں منٹ پر عمر توپراک نے کیا۔

بنڈس لیگا کا دوسرا میچ ڈے معمول کے مطابق جمعہ کے روز شروع نہیں ہو گا بلکہ اس کا آغاز تیرہ اگست بروز ہفتہ ہو گا۔ اس دن کل سات میچ کھیلے جائیں گے۔ دوسرے میچ ڈے کے دوسرے دن یعنی اتوار چودہ اگست کو دو میچ شیڈول ہیں۔

رپورٹ: عابد حسین

ادارت: ندیم گِل