جوہری توانائی آج سستی ہے، کل بہت مہنگی پڑ سکتی ہے: جرمن وزیر

یوکرائن میں چرنوبل کے جوہری حادثے کے پچیس برس مکمل ہونے پر ہفت روزہ ڈیرشپیگل کے لیے ایک مضمون میں نوربرٹ روئٹگین نے کہا کہ جوہری توانائی کے استعمال سے انسانی جانوں کو خطرہ لاحق ہے اور اس پہلو کے باعث طویل المدتی تناظر میں اس کی قیمت گنجائش سے باہر ہو جاتی ہے۔

انہوں نے کہا کہ جوہری توانائی کا استعمال ترک کرنے کے لیے جرمنی کا فیصلہ ذمہ دارانہ معاشی پالیسی کا حصہ ہے۔ انہوں نے کہا، ’وقتی طور پر یہ توانائی کا سستا ذریعہ ہو سکتا ہے، لیکن کسی تباہی کا سامنا کرنا پڑ جائے تو اس کی قیمت بہت زیادہ ہے۔ کوئی بھی اقتصادی ہدف شہریوں کی فلاح سے بڑھ کر نہیں ہو سکتا، نہ ہی آج اور نہ ہی مستقبل میں۔‘

جاپان میں حالیہ زلزلے اور سونامی کے باعث سامنے آنے والے فوکو شیما کے جوہری حادثے نے جرمنی میں جوہری توانائی کے منصوبوں کا رخ موڑ کر رکھ دیا ہے۔ اب برلن حکومت متعدد پاور پلانٹس بند کرنے کے بعد اس بات پر توجہ دے رہی ہے کہ جوہری توانائی کو پوری طرح کیسے ترک کیا جائے۔

روئٹگین نے یہ بھی کہا ہے کہ جاپان کے جوہری حادثے نے وہاں کی معیشت کو بھی شدید نقصان پہنچایا ہے۔ انہوں نے کہا کہ اس حادثے کے تناظر میں جوہری توانائی کا وسیع پیمانے پر پھر سے تجزیہ کیے جانے کی ضرورت پڑے گی، جس کے اشارے یورپ میں پہلے سے ہی دیکھے جا رہے ہیں۔

انہوں نے کہا کہ جاپان کی معیشت کو فوکوشیما کے جوہری حادثے کا بوجھ برسوں اٹھانا پڑے گا۔ انہوں نے کہا، ’اقتصادیات پر پڑنے والا یہ بوجھ جوہری توانائی کے استعمال پر پھر سے سوچنے پر مجبور کرے گا۔’

برلن حکومت اپنے ہاں لگے جوہری پاور پلانٹس کی مدت میں توسیع کا فیصلہ منسوخ کر چکی ہے، تاہم ابھی تک یہ طے نہیں کیا گیا کہ انہیں مستقل بند کب کیا جائے گا۔

رپورٹ: ندیم گِل/خبررساں ادارے

ادارت: عابد حسین