سری لنکا میں گالے ٹیسٹ میں آئرش ٹیم کی آج تک کی بدترین شکست

گرم مرطوب موسمی حالات میں گالے انٹرنیشنل اسٹیڈیم میں دونوں ممالک کی کرکٹ ٹیموں کے مابین کھیلے گئے اس پہلے ٹیسٹ میچ میں سری لنکا نے پہلے کھیلتے ہوئے اپنی پہلی اور واحد اننگز میں چھ وکٹوں کے نقصان پر 591 رنز بنا کر کھیل ختم کرنے کا اعلان کر دیا تھا۔

ایک اننگز میں چار سینچریاں

پہلی اننگز میں سری لنکا کے چار کھلاڑیوں نے سینچریاں اسکور کی تھیں۔ سب سے زیادہ رنز کپتان دیمُت کرُونارتنے نے بنائے تھے۔ وہ 179 رنز بنا کر آؤٹ ہوئے تھے۔ ان کے علاوہ کُوشل مینڈیس نے 140 رنز بنائے تھے جبکہ دینیش چندی مل 102 رنز بنا کر اور سادیرا سماراوکرمے 104 رنز بنا کر ناٹ آؤٹ رہے تھے۔

افغان کپتان کا پاکستان کے خلاف پہلی فتح پر مسرت کا اظہار

اس کے جواب میں آئرلینڈ کی پوری ٹیم اپنی پہلی اننگز میں صرف 143 رنز بنا سکی تھی اور فالو آن پر مجبور ہو گئی تھی۔ اس اننگز میں سری لنکا کی طرف سے پربھات جےسوریا نے صرف 52 رنز دے کر سات وکٹیں حاصل کی تھیں۔

فالو آن کے بعد اپنی دوسری اننگز میں آئرلینڈ کی ٹیم اس میچ کے تیسرے ہی روز آج منگل اٹھارہ اپریل کے دن محض 168 رنز بنا کر آؤٹ ہو گئی۔ سری لنکن بولر پربھات جےسوریا نے دوسری اننگز میں بھی تین کھلاڑیوں کو آؤٹ کیا اور یوں وہ اس میچ میں مجموعی طور پر دس وکٹیں حاصل کرنے میں کامیاب رہے۔

بھارتی مزدور کی بیٹی اب ویمنز کرکٹ پریمیئر لیگ میں کھیلیں گی

ٹیسٹ کرکٹ کی تاریخ کی سب سے بڑی کامیابیوں میں سے ایک

آئرلینڈ کی ٹیم کے موجودہ دورہ سری لنکا کے دوران گالے میں پہلے ہی ٹیسٹ میچ میں میزبان ٹیم نے مہمان ٹیم کو جتنے بڑے فرق سے ہرایا، وہ ٹیسٹ کرکٹ کی تاریخ کی سب سے بڑی کامیابیوں میں سے ایک ہے۔

بابراعظم پر سیکسٹنگ کا الزام، ایک لطیفہ جعلی خبر کا منبع

دلچسپ بات یہ ہے کہ یہ فتح ٹیسٹ کرکٹ کی تاریخ میں ایک اننگز سے بھی زیادہ کے فرق کی بنیاد پر آج تک کی 12 ویں سب سے بڑی کامیابی ثابت ہوئی۔ سب سے بڑے فرق سے حریف ٹیم کو ہراتے ہوئے اب سری لنکا سے اوپر 11 ویں نمبر پر جس ٹیم کا نام آتا ہے، وہ انگلینڈ کی ٹیم ہے۔ انگلینڈ نے 2007ء میں ویسٹ انڈیز کو ایک اننگز اور 283 رنز کے فرق سے ہرایا تھا۔

اس کے علاوہ خود سری لنکا کے لیے بھی یہ پہلا موقع تھا کہ اس نے ٹیسٹ کرکٹ میں اپنی کسی بھی حریف ٹیم کو پہلی بار اتنے بڑے فرق سے ہرایا۔ اس سے قبل سری لنکا کا سب سے بڑی ٹیسٹ کامیابی کا ریکارڈ 2004ء میں بنا تھا، جب اس جنوبی ایشیائی ملک نے زمبابوے کو بولاوایو میں ایک اننگز اور 254 رنز سے شکست دی تھی۔

’ایسے رنزوں کا کیا کرے کوئی‘

ٹیسٹ کرکٹ میں آئرلینڈ کی سب سے بڑی شکست

گالے ٹیسٹ کے تیسرے ہی دن میزبان ٹیم سے ایک اننگز اور 280 رنز سے ہار جانا آئرلینڈ کے لیے اس یورپی ملک کی ٹیسٹ کرکٹ کی تاریخ کی سب سے بڑی شکست بھی ثابت ہوئی۔ آئرلینڈ کو ٹیسٹ ٹیم کی حیثیت ملے ابھی زیادہ عرصہ نہیں ہوا۔

ٹیسٹ کرکٹ میں پاکستان کو پہلی بار اپنی میزبانی میں وائٹ واش

آئرلینڈ کی ٹیم نے آج تک صرف پانچ ٹیسٹ میچ ہی کھیلے ہیں اور ان پانچوں میچوں میں اسے شکست کا سامنا کرنا پڑا۔ تاہم جیسی شکست آئرش ٹیم کو آج گالے میں دیکھنا پڑی، ویسی ناکامی کا سامنا اسے آج تک کبھی نہیں کرنا پڑا تھا۔

م م / ع ا (اے ایف پی، روئٹرز)