غزہ میں لڑائی جاری، جنگ بندی کے اشارے

ہفتے کو مسلسل چوتھے روز بھی غزہ پٹی میں جنگی صورت حال برقرار رہی اور اسرائیل اور حماس نے ایک دوسرے پر حملوں کا سلسلہ جاری رکھا۔ اسی دوران ایسی خبریں بھی موصول ہوئیں جن سے جنگ بندی کے مبہم اشارے ملے۔

اس تنازعے میں اب تک کم از کم اڑتالیس افراد ہلاک ہو چکے ہیں جن میں تین اسرائیلی شہریوں سمیت پینتالیس فلسطینی بھی شامل ہیں۔ فلسطینی ذرائع کے مطابق ہلاک ہونے والے فلسطینیوں میں چودہ کے قریب عام شہری ہیں۔ اسرائیل کے مطابق اس نے عسکری کارروائی میں حماس کے ٹھکانوں کو نشانہ بنایا ہے۔

جرمن خبر رساں ادارے ڈی پی اے سے بات کرتے ہوئے عسکریت پسند فلسطینی تنظیم حماس کے ایک اہلکار نے کہا کہ حماس کے جلا وطن رہنما خالد مشعل نے ہفتے کے روز مصری دارالحکومت قاہرہ میں ممکنہ جنگ بندی کے حوالے سے مصری رہنماؤں سے ملاقاتیں کیں۔ عرب ذرائع ابلاغ کے مطابق اسرائیلی حکومت کے نمائندے بھی جنگ بندی کے امکانات پر بات چیت کے لیے قاہرہ پہنچ رہے ہیں۔

مصری صدر محمد مرسی نے ہفتے کے روز کہا کہ ان کی حکومت اسرائیلیوں اور فلسطینیوں دونوں ہی کے ساتھ رابطے میں ہے اور اس بات کا امکان ہے کہ جنگ بندی کا کوئی راستہ نکال لیا جائے گا۔

محمد مرسی نے ہفتے کو ترک وزیر اعظم رجب طیب ایردوآن کے ساتھ ایک مشترکہ پریس کانفرنس میں جنگ بندی کی امید ظاہر کی۔

دوسری جانب امریکی صدر باراک اوباما کے قومی سلامتی کے نائب مشیر بین روڈز نے بتایا کہ صدر اوباما اسرائیلی وزیر اعظر نیتن یاہو کے ساتھ مسلسل رابطے میں ہیں اور دونوں رہنماؤں کا موقف ہے کہ کشیدگی میں کمی آنی چاہیے۔
جمعے کے روز اسرائیل نے یہ عندیہ بھی دیا تھا کہ وہ غزہ پٹی میں اپنی زمینی افواج بھی روانہ کر سکتا ہے۔ اس سلسلے میں اسرائیلی حکومت نے پچہتر ہزار ریزرو فوجیوں کو طلب کرنے کی منظوری بھی دے دی تھی۔ اسرائیلی افواج کے ذرائع کے مطابق ضرورت پڑنے پر غزہ میں زمینی کارروائی بھی کی جا سکتی ہے۔ مبصرین کا تاہم کہنا ہے کہ غزہ میں زمینی کارروائی سے کشیدگی اور اموات میں اضافہ ہوگا اور ایسا کرنا اسرائیل کی مشکلات میں اضافے کا سبب بنے گا۔

shs / at (dpa, Reuters)