ویکسین لگوانے کی ویڈیو وائرل، وفاقی وزیر تنقید کی زد میں

سوشل میڈیا ایپ انسٹاگرام پر طارق بشیر کے ہی ایک رشتہ دار کے اکاؤنٹ سے یہ ویڈیو شائع کی گئی تھی۔ ویڈیو میں دیکھا جا سکتا ہے کہ ایک نرس ڈرائنگ روم میں بیٹھے کئی افراد کو باری باری ٹیکہ لگا رہی ہے۔ یہ ویڈیو سوشل میڈیا پر وائرل ہو گئی اور وفاقی وزیر کڑی تنقید کی زد میں آگئے۔ کئی افراد کا کہنا تھا کہ وزیر نے اپنا اثر و رسوخ استعمال کرتے ہوئے اپنے اہل خانہ کو کورونا وائرس کی ویکسین لگوائی ہے۔ اس ویڈیو میں پاکستان کی سابقہ ماڈل عفت عمر کو بھی دیکھا جا سکتا ہے۔ تاہم مسلم لیگ ق کے رہنما اور وفاقی وزیر طارق بشیر چیمہ نے پریس کانفرنس کرتے ہوئے ان الزامات کی تردید کی۔ ان کا کہنا تھا کہ ان کے اہل خانہ کو ایک ٹرائل ویکیسن کے انجیکشن لگائے گئے اور ایسا پہلے بھی ہوا ہے۔

تاہم اس وضاحت کے باوجود کئی افراد اس کے خلاف آواز اٹھاتے رہے۔ سماجی کارکن جلیلہ حیدر کا کہنا تھا کہ کی والدہ 58 سال کی ہیں اور وہ  ویکیسن لگوانے کی باری کے انتظار میں ہیں لیکن طاقت ور افراد کو ویکسین تک مکمل رسائی ہے۔

اسی طرح مہر تارڑ نے کہا،''طارق بشیر چیمہ کو معافی مانگنی چاہیے پہلے انہوں نے ایک غیر اخلاقی کام کیا اور پھر جھوٹ بولا کہ یہ ٹرائل ویکسین تھی۔''

ٹوئٹر کے ایک صارف عدیل راجہ کا کہنا تھا کہ عفت عمر ہمیشہ سچائی کی بات کرتی ہیں لیکن انہوں نے اپنی باری سے قبل ویکسین لگوانے میں دیر نہیں کی۔

راشد غفور نے سوال اٹھایا کہ کہ ویکسین کیسے سرکاری اہلکاروں کے گھروں تک پہنچ گئی؟

عفت عمر نے ٹوئٹر پر وفاقی وزیر کی پریس کانفرنس سے متعلق خبر کو شیئر کرتے ہوئے لوگوں سے گزارش کی کو وہ اس معاملے کو سنجیدگی سے نہ لیں۔

ب، ج/ ع ا

کورونا وائرس کے بڑھتے کیسز، پاکستان میں سخت پابندیاں عائد