پاکستان میں مون سون کی بارشیں، اب تک تقریباﹰ تین سو ہلاکتیں

پاکستانی دارالحکومت اسلام آباد سے نیشنل ڈیزاسٹر مینجمنٹ اتھارٹی (NDMA) کی جمعرات اکیس جولائی کو جاری کردہ تازہ ترین رپورٹ کا حوالہ دیتے ہوئے دی جانے والی اطلاعات کے مطابق گزشتہ تقریباﹰ پانچ ہفتوں کے دوران مون سون کی شدید بارشوں، ان کے بعد آنے والے سیلابوں اور انہی موسمیاتی حالات کے باعث پیش آنے والے دیگر واقعات کے نتیجے میں کم از کم بھی 282 پاکستانی ہلاک ہو چکے ہیں۔

پاکستان: موسمياتی تبديليوں کے باعث سیلابی ریلوں میں اضافہ

اس رپورٹ کے مطابق ملک کے بہت سے حصوں میں شدید بارشیں اب تک جاری ہیں جبکہ دریاؤں میں طغیانی کے نتیجے میں کئی علاقے زیر آب آ چکے ہیں، بہت سی شاہراہوں اور پلوں کو بھی نقصان پہنچا ہے اور تقریباﹰ چھ ہزار مکانات بھی مکمل یا جزوی طور پر تباہ ہو چکے ہیں۔

این ڈی ایم اے کی اس رپورٹ کے مطابق ان بارشوں اور ان کے بعد پیدا ہونے والی سیلابی صورت حال نے نہ صرف بہت سے علاقوں میں معمول کی عوامی زندگی کو متاثر کیا بلکہ اسی وجہ سے پاکستان کو اقتصادی حوالے سے بھی بےتحاشا نقصان ہوا۔

سب سے زیادہ بلوچستان متاثر ہوا

این ڈی ایم اے کے مطابق پاکستان میں حالیہ بارشوں اور سیلابوں کے نتیجے میں جو 282 افراد ہلاک ہوئے، ان میں بہت سے بچے اور خواتین بھی شامل ہیں۔ نیشنل ڈیزاسٹر مینجمنٹ اتھارٹی نے بتایا کہ سب سے زیادہ جانی اور مالی نقصان جنوب مغربی صوبہ بلوچستان میں ہوا۔ لیکن انہی حالات نے مشرقی صوبہ پنجاب اور جنوبی صوبہ سندھ میں بھی معمول کی سماجی اور کاروباری زندگی کو بہت نقصان پہنچایا۔

ایک لاکھ ایکڑ زرعی اراضی پر کاشت کی گئی فصلیں تباہ

پاکستان کو اپنے ہاں مون سون کی شدید بارشوں کے بعد آنے والے سیلابوں سے تقریباﹰ ہر سال ہی نمٹنا پڑتا ہے اور کئی شہری اور دیہی علاقے زیر آب آ جانے کی وجہ سے حکومتی منصوبہ بندی کو بھی تنقید کا نشانہ بنایا جاتا ہے۔

دوسری طرف پاکستان میں یہی بارشیں ملکی زرعی شعبے کی اچھی پیداوار اور ان ڈیموں کے دوبارہ بھر جانے کے لیے بھی بہت ضروری ہیں، جن میں شدید گرمی کے موسم میں پانی کی سطح بہت کم ہو جاتی ہے۔

م م / ک م (اے پی، ڈی پی اے)