پاکستانی طالبان کو افغان حکام کی پشت پناہی !

امریکی اخبار نیویارک نیویارک ٹائمز کی ایک رپورٹ کے مطابق افغانستان میں چند ہفتے پہلے امریکی فوجی پاکستانی طالبان لیڈر لطیف محسود کو افغان سکیورٹی اہلکاروں سے چھین کر بگرام ایئر بیس پر لے گئے تھے۔ اس کارروائی کے وقت افغان خفیہ اہلکار بھی لطیف محسود کے ساتھ تھے۔

نیویارک ٹائمز کی رپورٹ کے مطابق افغان خفیہ ایجنسی این ڈی ایس پاکستانی طالبان کو استعمال کرتے ہوئے پاکستانی حکومت خصوصاً فوج سے انتقام لینا چاہتی تھی۔ امریکی اخبار کی اس رپورٹ پر ڈی ڈبلیو کی جانب سے تحریری طور پر بھجوائے گئے سوال پر ردعمل ظاہر کرتے ہوئے پاکستانی دفتر خارجہ کے ترجمان اعزاز چوہدری نے کہا کہ "ہم اس معاملے پر امریکی اور افغان حکام سے رابطے میں ہیں۔ تحریک طالبان پاکستان کی افغانستان میں موجودگی کا معاملہ پاکستان کے لیے باعث تشویش ہےاور یہ موضوع افغان حکومت کے ساتھ بات چیت کا حصہ ہے۔"

پاکستانی ارکان پارلیمنٹ نے بھی ان خبروں پر تشویش کا اظہار کیا ہے کہ تحریک طالبان پاکستان کو مبینہ طور پر افغان حکام کی پشت پناہی حاصل ہے۔ سابق وزیر داخلہ اور پیپلز پارٹی کے سینیٹر رحمان ملک کا کہنا ہے کہ پہلے بھی بھارتی اور افغان حکام کی پاکستان مخالف مشترکہ سرگرمیوں کی اطلاعات تھیں۔ اب ہماری حکومت کو چاہیے کہ وہ اس معاملے کی مکمل چھان بین کرے۔ انہوں نے کہا:’’طالبان خواہ افغانستان کے ہوں یا پاکستان کے، ان کا ایک ہی مقصد ہے اور وہ ہے، پاکستان کے خلاف کام کرنا۔ اگر کوئی ایسی خبر ہے تو میں حکومت پاکستان سے اپیل کروں گا کہ اس کا بیک گراؤنڈ پتہ کیا جانا چاہیے اور اس کے خلاف ایکشن لیا جائے۔‘‘

افغان حکام بھی گزشتہ کئی سا لوں سے پاکستان پر الزام لگاتے آئے ہیں کہ وہ افغانستان میں اپنے ایجنڈے کے نفاذ کے لیے طالبان شدت پسندوں کی مدد کر رہا ہے۔ اس کے علاوہ امریکی حکام بھی متعدد بار پاکستان پر افغان طالبان کے حقانی نیٹ ورک کی مدد کرنے کا الزام لگا چکے ہیں تاہم پاکستانی حکومت ان الزامات کو ہمیشہ مسترد کرتی آئی ہے۔

پاکستانی ایوان بالا میں سینیٹ کی قائمہ کمیٹی برائے داخلہ کے چیئرمین اور جمعیت علماء اسلام کے سینیٹر طلحہ محمود کا کہنا ہے کہ خطے میں قیام امن کے لیے پاکستان اور افغانستان کو ایک دوسرے پر الزام تراشی سے بچنا ہو گا۔

انہوں نے کہا:’’اس میں نقصان ہو رہا ہے، پاکستان کو نقصان ہو رہا ہے، افغانستان کو۔ ہم دونوں ملکوں کا مفاد ایک ہی ہے۔ اگر ہم ایک دوسرے پر الزامات لگا کر آنکھ بچائیں گے تو وہ ٹھیک نہیں ہو گا۔ یہ ان (افغانستان ) کو چاہیے کہ اس معاملے کو سنجیدگی سے لے لیں۔ اگر ان پر الزم لگ رہا ہے تو اس کا حل نکالنے کی ضرورت ہے ورنہ دونوں ملکوں کے درمیان کنفیوژن بڑھے گا۔‘‘

خیال رہے کہ پاکستانی وزیر اعظم نواز شریف اور افغان صدر حامد کرزئی اسلامی اقتصادی فورم کے اجلاس میں شرکت کے لیے لندن میں ہیں۔

ان دونوں راہنماؤں نے منگل کو برطانوی وزیر اعظم ڈیوڈ کیمرون سے مشترکہ ملاقات کی تھی، جس میں فریقین نے قیام امن کے لیے اپنی ذمہ داریاں نبھانے کے عزم کا اعادہ کیا تھا۔