ڈورٹمنڈ کی ٹیم بہت آگے نکل گئی

بنڈس لیگا کے پچیسویں میچ ڈے میں ڈورٹمنڈ کا میچ کولون سے جمعہ کو ہوا، جو اس نے ایک صفر سے جیت لیا۔ اس کے بعد بنڈس لیگا کے ٹیبل پر ڈورٹمنڈ کے پوائنٹس 61 ہو گئے، یعنی اس کے لیے دُور دُور تک کوئی مقابل نہیں ہے۔

پچیسواں میچ ڈے ابھی جاری ہے اور اتوار کو اس کے آخری دو میچ کھیلے جائیں گے۔ پہلا مقابلہ فرائی برگ اور ویردر بریمن کے درمیان ہو گاجبکہ دوسرا میچ ہیمبرگ اور مائنز کے درمیان کھیلا جائے گا۔

دوسری جانب ہفتہ کو بائرن میونخ کو ہینوور سے ایک کے مقابلے میں تین گول سے شکست ہوئی ہے۔ بائر لیورکوزن نے وولفس برگ کو صفر کے مقابلے میں تین گول سے ہرایا۔ ہفتہ کے دیگر مقابلوں میں شٹٹ گارٹ نے شالکے کو ایک صفر سے مات دی، میونشن گلاڈ باخ نے ہوفن ہائم کو دو صفر سے پچھاڑا، نیورمبرگ نے سینٹ پاؤلی کو پانچ صفر سے ہرایا جبکہ فرینکفرٹ اور کائزرزلاؤٹرن کا میچ صفر صفر سے برابر رہا۔

بنڈس لیگا کا پوائنٹس ٹیبل

پوائنٹس ٹیبل پر ڈورٹمند کے بعد دوسرے نمبر پر انچاس پوائنٹس کے ساتھ بائر لیورکوزن ہے۔ تیسرے نمبر پر سینتالیس پوائنٹس کے ساتھ ہینوور ہے۔ چوتھا نمبر بائرن میونخ کا ہے اور اس کے پوائنٹس بیالیس ہیں۔ مائنز چالیس پوائنٹس کے ساتھ پانچویں نمبر پر ہے جبکہ انتالیس پوائنٹس کے ساتھ نیورمبرگ چھٹے نمبر پر ہے۔ ہیمبرگ اور فرائی برگ سینتیس 37 پوائنٹس کے ساتھ بالترتیب ساتویں اور آٹھویں نمبر پر ہیں۔ ہوفن ہائیم نویں نمبر پر ہے اور اس کے پوائنٹس تینتیس ہیں جبکہ دسویں نمبر پر تیس پوائنٹس کے ساتھ شالکے ہے۔

پوائنٹس ٹیبل پر سب سے نیچے، یعنی اٹھارہویں نمبر پر میونشن گلاڈ باخ ہے اور اس کے پوائنٹس بائیس ہیں۔

اتوار کے میچ میں مائنز کو فتح ملی تو وہ بائرن میونخ کو نیچے گراتے ہوئے چوتھے نمبر پر چلی جائے گی، تاہم یہ میچ ہیمبرگ نے جیت لیا تو وہ ساتویں نمبر سے پانچویں پر مائنز کی جگہ لے لے گی، جسے چھٹے نمبر پر آنا پڑے گا۔

رپورٹ: ندیم گِل

ادارت: عاطف توقیر