یورو زون بحران پر غور کے لیے پیرس میں جی ٹونٹی کے وزرائے خزانہ کا اجلاس

فرانس کی وزارت خزانہ کے ایک ذریعے نے خبر رساں ادارے روئٹرز کو بتایا کہ یہ دو روزہ اجلاس ایک ایسی صورت حال کے تناظر میں منعقد کیا جا رہا ہے جس میں جی ٹونٹی کی کامیابی کا انحصار یورو زون کے استحکام پر ہو گا۔

ذرائع کے مطابق اجلاس میں جی ٹونٹی کے وہ رکن ممالک بھی کوئی لگی لپٹی رکھے بغیر اپنے خیالات کا اظہار کریں گے، جن کا تعلق یورو زون سے نہیں ہے۔

کینیڈا کے وزیر خزانہ جم فلیہرٹی نے جمعرات کو اوٹاوا سے روانگی سے قبل صحافیوں سے بات چیت میں کہا تھا کہ یورو زون کی جانب سے بحران کو حل کرنے کے لیے اٹھائے جانے والے اقدامات ناکافی ہیں۔

یورو زون کی دو بڑی اقتصادی طاقتوں فرانس اور جرمنی میں بینکوں کو مزید سرمایے کی فراہمی کے طریقہ کار پر اتفاق ہونا باقی ہے۔ دونوں ملکوں کے درمیان یورو زون کے لیے ایک مشترکہ بانڈ جاری کرنے کے تصور پر بھی اختلافات پائے جاتے ہیں۔

یہ امکان موجود ہے کہ فرانس اور جرمنی بحران سے نمٹنے کے لیے بینکوں سے یونان کو دیے گئے قرضوں پر نقصان قبول کرنے کو کہیں گے اور مشکلات کے شکار بینکوں کو مزید سرمایے کی فراہمی کا طریقہ کار وضع کر لیں گے۔ بنیادی چیز European Financial Stability Fund یعنی یورپ کے مالی استحکام کے فنڈ کی طاقت میں اضافہ کرنے اور اقتصادی رابطہ کاری پر اتفاق کرنا ہے۔

تاہم اس اجلاس میں عالمی مالیاتی عدم توازن کا اندازہ لگانے اور اجناس کی منڈی کے اتار چڑھاؤ اور قیاس آرائیوں پر مبنی سرمایے کی آمد جیسے معاملات زیر غور نہیں آئیں گے۔ ان اور دیگر معاملات پر تفصیلی غور 23 اکتوبر کو برسلز میں یورو زون کے سربراہان مملکت کے اجلاس میں کیا جائے گا۔

اجلاس کے ذرائع نے روئٹرز کو بتایا کہ چین پیرس اجلاس میں ایک پانچ سالہ منصوبے کے ذریعے اپنے ملک میں اشیائے صرف کی خریداری کے رجحان کو فروغ دینے سے وابستگی ظاہر کرے گا۔

اپریل میں ہونے والے جی ٹونٹی کے اجلاس میں سات بڑی معیشتوں کو زیر نگرانی رکھا گیا تھا جن میں امریکہ، چین، فرانس، برطانیہ، جرمنی، جاپان اور بھارت شامل ہیں۔

اجلاس کے دوران رواں ہفتے میں ہونے والی بعض پیشرفتوں کا بھی جائزہ متوقع ہے جن میں امریکی سینیٹ میں بیجنگ پر اپنی کرنسی کی قدر میں اضافہ کرنے کے لیے دباؤ بڑھانے کے بل کی منظوری اور جمعرات کو ریٹنگ ایجنسی اسٹینڈرڈ اینڈ پورز کی جانب سے اسپین کی درجہ بندی AA سے گھٹا کر AA- کرنا شامل ہیں۔ اسٹینڈرڈ اینڈ پورز نے ملک میں بڑھتی ہوئی بیروزگاری، بینکوں سے قرضوں کی دستیابی میں کمی اور نجی شعبے کے بڑھتے ہوئے قرضوں کو درجہ بندی میں کمی کے فیصلے کی وجہ بتایا ہے۔

رپورٹ: حماد کیانی

ادارت: امجد علی