بشار الاسد مسکو ته پناه وړې، امنيت شورا غونډه رابللې ده
۱۴۰۳ آذر ۱۹, دوشنبه
د روسیې د تاس خبري آژانس د رپوټ په حواله چې د کريلمن له قوله یې ورکړی دی، د سوریې د واکه ګوښه کړل شوي ولسمشر بشار الاسد، ته په روسيه کې پناه ورکړل شوې ده او دمګړۍ په مسکو کې دی.
ياغيان چې مشري یې اسلامستان کوي، د يکشنبې په سهار یې د ولسمشر اسد، ځواکونه تېښتې ته مجبور کړل او دمشق ته په داخليدو سره یې د اسد د کورنۍ تر ۵۰ کلونو اوږدې واکمنۍ ته د پای ټکي کیښود.
یاغيانو د سيمې پر وخت د مازديګر له څلور بجو څخه د ديارلسو ساعتونو ګرځبندیز وضع کړی دی، چې د چهار شنبې تر سهار پنځو بجو پورې به دوام ولري.
په ټول هېواد کې خلکو په راغونډيدو سره د اسد پرځيدل ولمانځل او ځينو یې د اسد د کور ليدو ته ورغلي ول.
د هيئت تحرير شام ډلې مشر ابو محمد الجولاني، چې د ياغيانو مشري کوي، د دمشق له اموي مسجد څخه ولس ته وينا وکړه.
نوموړي وويل: «زما ورونو، دا بريا د سيمې له پاره تاريخي ده.»
د امريکا متحده ايالاتو ولسمشر جو بایدن، وويل چې د واک د انتقال په ترڅ کې به «واشنګټن له ټولو سوريايي ډلو سره همکاري وکړي» او زياته یې کړه چې اسد، به د خپلو کړنو ځواب ويلو ته مجبور کړل شي.
د نړۍ يو شمير نورو مشرانو هم د اسد د ديکتارۍ د پای ته رسېدو هرکلی کړی دی.
د اروپايي اتحادیې کمېسيون مشرې اورزولا فون ډېر لاین، وويل: «دا تاريخي چانس د سيمې له پاره فرصتونه برابروي خو ګواښونه هم ورسره مل دي.»
امنيت شورا به د سوریې په اړه غونډه وکړي
روسیې د دوشنبې ورځې له پاره د ملګرو ملتونو د يوې بيړنۍ ناستې غوښتنه کړې ده.
يو شمير سرچينو د فرانس پريس او آلمان خبري آژانسونو ته وويل چې غونډه نن، دوشنبه د ماسپښين دريو بجو له پاره په نظر کې نيول شوې ده او د بندو دروازو ترشا به وي.
ياغي ډلو په تېرو ۱۱ ورځو کې ناڅاپي پرمختګونه وکړل او دمشق ته په رسېدو سره يې د اسد، حکومت ړنګ کړ.