پاکستانی بچوں کے جنسی استحصال کے خلاف ایپ: ’میرا بچہ الرٹ‘

ملکی دارالحکومت اسلام آباد سے بدھ دو اکتوبر کو موصولہ نیوز ایجنسی ڈی پی اے کی رپورٹوں کے مطابق وزیر اعظم عمران خان نے اس ایپ کی تیاری کا حکم بچوں کے جنسی استحصال کے ان متعدد حالیہ واقعات کے بعد دیا، جن پر اس جنوبی ایشیائی ملک میں عوام کی طرف سے شدید غم و غصے کا اظہار کیا جا رہا تھا۔ اس اسمارٹ فون ایپلیکیشن کا مقصد متاثرہ بچوں کے والدین کی طرف سے پولیس کو اطلاع دیے جانے کے عمل کو فوری، محفوظ اور آسان تر بنانا ہے۔

ڈی پی اے نے لکھا ہے کہ عمران خان کی طرف سے یہ حکم اس حالیہ واقعے کے پس منظر میں دیا گیا ہے، جس میں پولیس نے ایک ایسے شخص کو گرفتار کر لیا تھا، جس نے صوبہ پنجاب کے ضلع قصور میں چار نوجوان لڑکوں کو جنسی زیادتی کا نشانہ بنانے کے بعد قتل کر دیا تھا۔

ان چاروں لڑکوں کے اغواء، ریپ اور پھر قتل کے واقعات گزشتہ ماہ اسی ضلع قصور میں پیش آئے تھے، جہاں گزشتہ برس ایک سات سالہ بچی زینب کو بھی ریپ کے بعد قتل کر دیا گیا تھا۔ زینب کا قتل پاکستان کے علاوہ بین الاقوامی ذرائع ابلاغ تک میں سرخیوں کا موضوع بنا تھا اور اس جرم کی وجہ سے پورا پاکستانی معاشرہ سکتے میں آ گیا تھا۔

ذاتی طور پر تھانے جانا ضروری نہیں ہو گا

پاکستانی وزیر اعظم کے دفتر کی طرف سے اسلام آباد میں جاری کردہ ایک بیان کے مطابق اس نئی ایپ کا نام 'میرا بچہ الرٹ‘ ہو گا اور اس کے ذریعے کسی بھی متاثرہ بچے یا بچی کے والدین اب تک مروجہ عشروں پرانے نظام سے بچتے ہوئے حکام کو ایسے جرائم کی فوری اطلاع دے سکیں گے۔

تاحال مروجہ نظام کے تحت کسی بھی شہری کو ایسے کسی جرم کی اطلاع دینے کے لیے ذاتی طور پر متعلقہ تھانے میں جانا ہوتا ہے۔ لیکن اس نظام کا ایک نقصان بھی ہے۔

جنسی جرائم اور جنسی استحصال کا نشانہ بننے والے بہت سے بچوں کے والدین، خاص طور پر دیہی علاقوں کے باشندے اور چھوٹی چھوٹی سماجی برادریوں کے ارکان پولیس کو ایسے جرائم کی اطلاع دیتے ہوئے اس لیے ہچکچاتے ہیں کہ انہیں اپنی اور اپنے خاندان کی شرمندگی اور سماجی بدنامی کا خوف لاحق رہتا ہے۔

سارے صوبوں میں فوری اطلاع

’میرا بچہ الرٹ‘ نامی ایپ کے بارے میں پاکستانی وزیر اعظم کے دفتر کی طرف سے کہا گیا ہے کہ اس نئے آن لائن طریقہ کار سے پولیس کو ایسے جرائم کی اطلاع دینے کی راہ میں حائل رکاوٹوں کو دور کیا جا سکے گا۔

بیان کے مطابق، ''اس ایپ کی مدد سے پاکستان کے سارے صوبوں کے حکام کو فوری اطلاع مل جایا کرے گی اور ساتھ ہی متعلقہ بچوں اور ان کی والدین کی سلامتی کو بھی یقینی بنایا جا سکے گا۔‘‘ عمران خان کے دفتر کے ایک ترجمان نے بدھ کے روز ڈی پی اے کو بتایا، ''وزیر اعظم نے حکم دیا ہے کہ اس ایپ کی تیاری کا کام دو ہفتوں کے اندر اندر مکمل کر لیا جائے۔‘‘

پاکستانی بچوں کے خلاف جنسی جرائم کے پریشان کن اعداد و شمار

پاکستان میں بچوں کی فلاح اور تحفظ کے لیے سرگرم ایک سرکردہ غیر سرکاری تنظیم 'ساحل‘ کے اعداد و شمار کے مطابق گزشتہ برس ملک بھر میں بچوں کے اغواء اور ان کے ریپ کے کم از کم بھی 3,832 واقعات رپورٹ کیے گئے تھے۔ ان میں سے 55 فیصد جرائم کا نشانہ کم عمر لڑکیاں بنی تھیں۔

2015ء میں پاکستانی صوبہ پنجاب کا شہر قصور اس وقت بھی عالمی سطح پر سرخیوں کا موضوع بنا تھا، جب ایسی سینکڑوں ویڈیوز کا پتہ چلا تھا، جن میں بچوں سے کی جانے والی جنسی زیادتیاں اور ان کے جنسی استحصال کے واقعات ریکارڈ کیے گئے تھے۔

بعد میں پولیس نے ایسے جرائم میں ملوث ایک گروپ کے کئی ارکان کو گرفتار بھی کر لیا تھا۔ یہ مجرم ایسے عناصر تھے، جو ایسی ویڈیوز کو یورپ میں چائلڈ پورنوگرافی کی ویب سائٹس کو فروخت کرتے تھے۔

م م / ع ا (ڈی پی اے)