پاکستانی فوج کے لیفٹیننٹ کرنل سمیت چار افراد اغوا

پاکستانی انٹیلیجنس اداروں کے کم از کم دو ذرائع نے جرمن نیوز ایجنسی ڈی پی اے کو بتایا کہ ملکی فوج کے ایک لیفٹیننٹ کرنل، خالد خان اپنے والد کے جنازے میں شرکت کے بعد تعزیت کے لیے آنے والے افراد سے ملاقات کے لیے ایک مقامی مسجد میں موجود تھے۔ خالد خان اپنے والد کے انتقال کی وجہ سے اپنے آبائی علاقے میں گئے تھے۔

ڈی پی اے نے لکھا ہے کہ بدھ کے روز لیفٹیننٹ کرنل خالد خان کے ساتھ جن تین دیگر افراد کو اغوا کیا گیا، ان میں اس فوجی افسر کے دو بھائی بھی شامل ہیں، جو خود بھی سرکاری افسران ہیں۔ ان چاروں کے اغوا کی ذمے داری ابھی تک کسی بھی گروہ نے قبول نہیں کی تاہم حساس ریاستی اداروں کے مقامی حکام کو شبہ ہے کہ ان چاروں کو پاکستانی طالبان نے اغوا کیا ہے۔

بعد ازاں ایک مقامی پولیس اہلکار اکرام اللہ نے بتایا کہ مغویوں میں لیفٹیننٹ کرنل خالد خان، ان کے دو بھائی جو دونوں ہی سرکاری افسران ہیں، اور ان کا ایک بھتیجا شامل ہیں، جن کی تلاش اور بازیابی کے لیے پوری کوششیں کی جا رہی ہیں۔

پاکستان میں گزشتہ کئی برسوں سے جاری مذہب کے نام پر دہشت گردی اور عسکریت پسندی کے دوران ہزاروں مسلح حملوں میں اندازوں کے مطابق تقریباً 80 ہزار تک انسان مارے جا چکے ہیں۔ ان عسکریت پسندوں کی ممنوعہ تنظیموں میں سے ایک بڑا گروہ مقامی طالبان کی تحریک طالبان پاکستان (ٹی ٹی پی) بھی ہے۔ اس گروہ کے عسکریت پسند خاص کر ملک کے شورش زدہ شمال مغربی علاقوں میں کافی فعال ہیں۔

اگست 2021ء میں کابل میں افغان طالبان کے دوبارہ اقتدار میں آ جانے کے بعد سے پاکستان میں ٹی ٹی پی کے خونریز حملے بھی دوبارہ کافی زیادہ ہو چکے ہیں۔ پاکستانی طالبان ماضی میں بھی کئی مرتبہ ملکی سکیورٹی اہلکاروں اور عام شہریوں کو اغوا کر چکے ہیں۔

خبر رساں اداروں نے پاکستانی انٹیلیجنس ذرائع کے حوالے سے لکھا ہے کہ حکام کو خدشہ ہے کہ لیفٹیننٹ کرنل خالد خان اور ان کے خاندان کے تین دیگر مردوں کے اغوا کار شاید ان کی رہائی کے بدلے میں حکام سے زیر حراست عسکریت پسندوں کی رہائی کا مطالبہ کر سکتے ہیں۔

ح ف / م م (ڈی پی اے، اے پی)